عاسىردان اسقان عۇمىرلار

وڭتۇستىك قازاقستان وبلىسىنداعى سايرام اۋدانىندا, قۇدايعا شۇكىر, قازىنا-قاريالار جەتەرلىك. ارالارىندا ۇزاق جاساپ, عاسىردان استام عۇمىر كەشكەندەرى دە بار. جاپونيادا نەمەسە ءۇندىستاندا ۇزاق جاساعان قاريالار تۋرالى وقىپ, ءبىلىپ جاتساق, «اپىر-اي, ءا» دەپ تامسانىپ جاتامىز. ايتسە دە, وزىمىزدەگى قارتتار جونىندە تىم سيرەك جازاتىنىمىز راس. وسى اۋدانداعى كولكەنت اۋىلىندا تۇراتىن ايىمكۇل دۇيسەباەۆا اجەمىز بۇگىندە 111 جاستان اسىپ, ايماقتاعى ۇزاق جاساۋشىلاردىڭ كوشىن باستاپ تۇر. جىبەك جولى اۋىلىندا عۇمىر كەشىپ جاتقان جۇماقىز قىدىرباەۆا اجەمىز ءساۋىر ايىندا 103 جاسقا تولعالى وتىر. ال, اقسۋكەنت­تىك تاجىگۇل نىشانتاەۆا اجەمىز بولسا, 102-گە اياق باستى. قارابۇلاق اۋىلىندا تۇراتىن توتى نيازوۆا اجەمىز دە 100-دەن استى. بۇگىندە ولاردىڭ ءۇرىم-بۇتاقتارىنىڭ ءوزى ءبىر قاۋىم ەلگە اينالعان. ءبىز تەك 100-دەن اسقان اجەلەرىمىزدى عانا تىلگە تيەك ەتىپ وتىرمىز. ايتپەسە, سايرام توپى­راعىندا تۋىپ, 90 جاساعان قازىنا-قا­ريالار ونداپ سانالادى. ءبىر قىزىعى, وسى ۇزاق جاساعان اجەلەرىمىز ناۋرىزدىڭ 20-سىندا وتەتىن پارلامەنت ءماجىلىسى مەن جەرگىلىكتى ءماسليحاتتار دەپۋتاتتارىن سايلاۋعا قاتىسۋعا قۇشتارلىق تانىتىپ وتىرعاندارى كىمدى بولماسىن قىزىقتىرارى انىق. بۇرىنعىلار «كۇلسەڭ, كارىگە كۇل» دەۋشى ەدى, ال اجەلەرىمىزدىڭ بۇل ارەكەتتەرى ناعىز ۇلگى تۇتاتىن قاسيەت ەمەس پە؟! ەرداۋلەت تۇراپبەك ۇلى. وڭتۇستىك قازاقستان وبلىسى, سايرام اۋدانى.