زيالى قاۋىممەن جۇزدەستى

وتكەن سەنبى كۇنى قازاقستانعا كەلگەن جۇمىس بابىنداعى ساپارى اياسىندا تۇرىك رەسپۋبليكاسىنىڭ پرەمەر-ءمينيسترى احمەت داۋىتوعلى حالىقارالىق تۇركى اكادەمياسىنىڭ ۇيىتقى بولىپ ۇيىمداستىرۋىمەن قازاق جانە تۇرىك زيالىلارى, كورنەكتى عالىمدار, مەملەكەت جانە قوعام قايراتكەرلەرى الدىندا ارنايى ءدارىس وقىدى. استاناداعى بەيبىتشىلىك جانە كەلىسىم سارايىنىڭ «بەسىك» زالىندا وتكەن بۇل القالى جيىنعا, سونداي-اق, مەملەكەتتىك لاۋازىمدى تۇلعالار, سەناتورلار, قازاقستاندا تىركەلگەن ديپلوماتيالىق كورپۋستار جەتەكشىلەرى, جوو رەكتورلارى مەن باق باسشىلارى قاتىستى. عيبراتتى جيىندى تۇركى اكا­دەمياسىنىڭ باسشىسى دارحان قىدىرالى اشىپ, جۇرگىزىپ وتىردى. العاشقى ءسوز كەزەگىن العان مەم­لەكەت جانە قوعام قايراتكەرى مىر­زاتاي جولداسبەكوۆ مارتەبەلى مەيماندى اتاجۇرت تورىندە قۇتتىقتاپ, ساپارىنىڭ وڭ, قادامىنىڭ قۇتتى بولۋىن تىلەپ, قازاق-تۇرىكتىڭ ءتۇبى ءبىر تۋىستىعىنىڭ تەرەڭ تامىرلارىن باجايلاپ ايتا كەلە, بۇل كەزدەسۋدىڭ ايشىقتى ءمان-ماڭى­زىنا توقتالدى. – ءبىز تالاي قيىن كەزدەردى ارتقا تاستادىق. بىراق ءتىلىمىزدى جانە باۋىرلارىمىزدى ۇمىتپادىق. قوجا احمەت ءياساۋيدىڭ باسىنا بارعان سايىن تەبىرەنەمىن. قازاقستان مەن باسقا دوس ەلدەر تاۋەلسىزدىك العان­دا مۇنى اۋەلى جۇرەگىمىزبەن, كەيىن مورىمىزبەن تانىدىق, – دەگەن ا.داۋىتوعلى جينالعانداردى قازاق­ستان تاۋەلسىزدىگىنىڭ الداعى 25 جىلدىعىمەن قۇتتىقتادى. ودان سوڭ تاريح پەن جاعىرافيا ەشقاشان وزگەرمەيتىنىن ەسكە سالدى. جىبەك جولىنىڭ بويىندا اتا-بابالارىمىزدىڭ ۇلكەن مەم­لەكەتتەرى بوي تۇزەگەنىن, ساراەۆودان قىتايعا دەيىنگى ايماقتا تۇراتىن حالىقتار تۇركى تىلىندە سويلەيتىنىن تىلگە تيەك ەتتى. ولاي بولسا, قازىرگى نەگىزگى ماقساتتاردىڭ ءبىرى – دوستىق پەن تۋىستىق اياسىندا كولىك جانە ەنەرگەتيكا ارقىلى ايماقتار مەن ەلدەردى ءبىر-بىرىمەن بايلانىستىرۋ. وسى رەتتە, تۇركيانىڭ كەمەجايلارى قازاقستاننىڭ كەمەجايلارى بولادى. – 25 جىل بۇرىن استاناعا كەلگەن بولساڭىز, شاعىن قالاشىق كورەر ەدىڭىز, – دەدى مارتەبەلى مەيمان. – وسى قالاشىقتىڭ بۇگىنگىدەي جارقىن ساۋلەتكە يە بولۋى تۇركى الەمىنىڭ اقساقالى نۇرسۇلتان نازار­باەۆ پەن قازاق حالقىنىڭ ۇلكەن جەتىستىگى. بۇل ەلدىڭ ۇلكەن مۇمكىن­دىكتەرى بار. ەۋرازيانى بەيبىت­شىلىك كەڭىستىگى جاساۋىمىز قاجەت. وسى رەتتە تۇركيا مەن قازاق­ستان ءوز باعىتى مەن ماقساتى بار تۇراقتىلىق مەكەنى. قازاق پەن تۇرىكتىڭ الەۋەتىن قوسساق, ايتار­لىقتاي ەكونوميكالىق جەتىستىككە جەتە الامىز. ...وسى سيپاتتاعى مازمۇندى ءدارىستى جينالعاندار ىقىلاسپەن تىڭدادى. حالىقارالىق تۇركى اكادەمياسى پروفەسسورىنىڭ مانتياسى رەتىندە جابىلعان قۇندىز بورىكتى قازاق شاپانى تۇرىك پرەمەرىنە بەك جاراستى. قورعانبەك امانجول, «ەگەمەن قازاقستان».