«تىرەگىمىز – تاۋەلسىزدىك, تىلەگىمىز – تۇراقتىلىق, بىلەگىمىز – بىرلىك»

كەشە استاناداعى ۇلتتىق اكادەميالىق كىتاپحانادا تاۋەلسىزدىكتىڭ 25 جىلدىعىنا ارنالعان وسى تاقىرىپتاعى كىتاپ كورمەسى جانە «اقىندار تاۋەلسىزدىكتى جىرلايدى» اتتى پوەزيالىق مارافون ءوتتى. اتالمىش كورمەنىڭ نەگىزگى ماقساتى – قازاقستاننىڭ قازىنالى تاريحىن, 25 جىل ىشىندەگى ەكونوميكا, ساياسات جانە الەۋمەتتىك سالاداعى جەتىستىكتەرىن, الەمدىك قاۋىمداستىققا تانىلعان مەم­لەكەتىمىزدىڭ قارىشتى, قارقىندى دامۋ كەزەڭدەرىن بايانداۋ. كورمەدە بەس ينستيتۋتتىق رەفورمانى جۇزەگە اسىرۋ بويىنشا «100 ناقتى قادام» – ۇلت جوسپارىن جانە 2015 جىلعى 30 قاراشاداعى ەلباسى ن.ءا.نازارباەۆتىڭ قازاقستان حالقىنا ارناعان «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى جولداۋىن تۇسىندىرۋگە باسا نازار اۋدارىلعان. قازاق مەملەكەتىنىڭ سان عاسىرلىق دامۋ تاريحىنداعى ۋاقىت پەن ۇرپاقتار ساباقتاستىعىن كورسەتۋ, سونداي-اق, جاستاردىڭ پاتريوتتىق سەزىمىن وياتىپ, وڭ ءيميدجىن قالىپتاستىرۋ شاراپاتتى شارانىڭ نەگىزگى مىندەتى رەتىندە ايشىقتالعان. كورمەدەن بولەك, جىردان شاشۋ شاشقان اقىنداردىڭ پوە­زيالىق كەشى دە وتكەن تاري­حىمىزدىڭ وشپەس تۇستارىن بايان­داۋعا باعىتتالدى. بودان­دىقتان بوستاندىققا دەيىنگى عۇمىرىمىزدى ءار اقىن الىنشە جىرلادى. اقىن, حالىقارالىق «الاش» سىيلىعىنىڭ يەگەرى سەرىك تۇرعىنبەكوۆ تاۋەلسىزدىك دەي­تىن ءتاتتى ۇعىمىنىڭ ءمانى مەن ماڭى­زىن تەرەڭ تەبىرەنىسپەن قوزعاپ, تىڭدارماننىڭ ويىن تاريح كو­شىنە ىلەستىرىپ اكەتكەندەي كۇيگە بولەدى. ودان سوڭ بۇگىنگى جاس­تار پوەزياسىنىڭ جالىندى وكىل­دەرى ەربول بەيىلحان, ولجاس قاسىم, ەربول الشىنباي ولەڭ­دەرىن ورلەتتى. ايتۋلى كەشتىڭ تىزگى­نىن ايتىسكەر اقىن, «دارىن» مەم­لەكەتتىك جاستار سىيلىعىنىڭ لاۋ­رەاتى داۋلەتكەرەي كاپ ۇستاپ, ادەبيەت الەمىندەگى ويلى وقيعا­لاردى ورتاعا سالدى. راۋان قايدار, «ەگەمەن قازاقستان».