سپورتشى ستۋدەنتتەردىڭ سايىسى

الماتىداعى «سۇڭقار» حالىقارالىق ترامپليندەر كەشەنىندە ءVى ۇلتتىق رەسپۋبليكالىق قىسقى ۋنيۆەرسيادا ويىندارىنىڭ سالتاناتتى اشىلۋ ءراسىمى بولىپ ءوتتى. كەلەر جىلى كۇللى دۇنيەنىڭ نازارى اۋىپ, قازاقستاندا وتكىزىلەتىن ەڭ ءدۇبىرلى شارا – بۇكىل­الەمدىك قىسقى ۋنيۆەرسيادا ويىندارىنا جولداما الۋ مۇمكىندىگىن تۋدىرىپ وتىرعان بۇل رەسپۋبليكالىق الاماندا قازاقستان رەسپۋبليكاسى ءبىلىم جانە عىلىم ءمينيسترى اسلان ءسارىنجىپوۆ ەلىمىزدىڭ 34 جوعارى وقۋ ورىندارىنان جينالعان سپورتشى ستۋدەنتتەردى ۋنيۆەرسيادا ويىندارىنىڭ باستالۋىمەن قۇتتىقتاپ, ولارعا ساتتىلىك تىلەدى. – بۇل ءVى ۇلتتىق ۋنيۆەرسيادا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالىپ وتىر. وسى ءبىر شيرەك عاسىر ىشىندە قازاقستان الەۋمەتتىك-ەكونوميكا سالاسىندا دا, سپورتتا دا ۇلكەن جەتىستىكتەرگە قول جەتكىزدى. بۇگىنگى ۋنيۆەرسيادا ويىندارىندا ەلىمىزدىڭ تۇكپىر-تۇكپىرىنەن كەلگەن مىڭنان استام سپورتشى ستۋدەنت باق سىناپ, ءوزىنىڭ فيزيكالىق الەۋەتىن سارقا جۇمسايدى. ال جەڭىمپاز اتانعاندار 2017 جىلى الماتىدا وتەتىن ءححVىىى بۇكىلالەمدىك قىسقى ستۋدەنتتىك ۋنيۆەرسيادا ويىندارى بارىسىندا ۇلتتىق قۇراما كوماندا ساپىندا ونەر كورسەتىپ, ەل نامىسىن قورعايتىن بولادى, – دەدى اسلان ءسارىنجىپوۆ. ستۋدەنتتىك سپورت فەدەراتسياسىنىڭ پرەزيدەنتى قايرات زاكىريانوۆ FISU (حالىقارالىق ستۋدەنتتىك سپورت فەدەراتسياسى) ۇيىمىنىڭ جىبەرگەن قۇتتىقتاۋ حاتىن وقىپ بەرىپ, الداعى بۇكىلالەمدىك ۋنيۆەرسياداعا دايىندىقتىڭ جوعارى دەڭگەيدە جۇرگىزىلىپ جاتقاندىعىن اتاپ ءوتتى. ول ءوز سوزىندە دەنساۋلىقتىڭ مىقتى بولۋى مەديتسيناعا عانا ەمەس, ادامنىڭ ءومىر ءسۇرۋ سالتىنا دا بايلانىستى ەكەندىگىن جەتكىزە وتىرىپ, سپورتشى جاستارعا جەڭىس تىلەدى, ەل نامىسىن قورعاپ, قازاق تۋىن بيىكتەردەن جەلبىرەتۋگە شاقىردى. سونداي-اق, سپورتتىڭ قىسقى تۇرلەرىنەن وتكىزىلەتىن الاماننىڭ اشىلۋ سالتاناتىنا ارنايى كەلىپ قاتىسقان ەلىمىزدىڭ ايتۋلى سپورت جۇلدىزدارى جاقسىلىق ۇشكەمپىروۆ, ەلەنا حرۋستالەۆا جانە ەرماحان ىبىرايىموۆ سپورتشى جاستارعا قولداۋ كورسەتتى. سپورت مەرەكەسىنىڭ اشىلۋ ءراسىمى اياسىندا ستۋدەنتتىك كور­كەمونەرپازدار ۇجىمدارى جانە تانىمال Ringo توبىنىڭ قاتىسۋىمەن كونتسەرتتىك باع­دارلاما قويىلدى. جەتىسۋ جەرىندە اقپان ايىنىڭ 6-17 ارالى­عىندا ۇيىمداستىرىلىپ وتىرعان ءVى ۇلتتىق ۋنيۆەرسيادا ويىندارىندا ستۋدەنت جاستارىمىز قىسقى سپورتتىڭ 10 تۇرىنەن باقتارىن سىنايدى. قانات ەسكەندىر, «ەگەمەن قازاقستان». الماتى. سۋرەتتەردى تۇسىرگەن يۋري بەككەر.