ورالدا بۇقارالىق شاڭعى جارىسى ءوتتى

ورال. 31 قاڭتار. باتىس قازاقستان وبلىسىنىڭ ورتالىعى – ورال قالاسىنداعى قالالىق مادەنيەت جانە دەمالىس ساياباعىندا تاۋەلسىزدىكتىڭ 25 جىلدىعىنا وراي ءداستۇرلى بۇقارالىق شاڭعى جارىسى ءوتتى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. شاراعا قاتىسقان وبلىس اكىمى نۇرلان نوعاەۆ وڭىردە ەلباسى تاپسىرماسىنا سايكەس قالىڭ بۇقارانى سپورتپەن اينالىسۋعا كەڭىنەن تارتۋ ماقساتىندا جازدا جەڭىل اتلەتيكا, ۆەلوسيپەد, قىستا شاڭعى جارىستارى ۇدايى ۇيىمداستىرىلىپ تۇراتىنىن ايتتى. ونىڭ ايتۋىنشا, وبلىستىق دەنە شىنىقتىرۋ جانە سپورت باسقارماسى ۇيىتقى بولعان بۇل جولعى شارا بيىل جازدا ريو-دە-جانەيرودا وتەتىن ءحححى جازعى وليمپيادا ويىندارىندا ونەر كورسەتىپ, ەل نامىسىن قورعايتىن سپورتشىلاردى قولداۋعا ارنالدى. ۇزىندىعى 3 شاقىرىم بولاتىن شاڭعى جارىسىنا ءتۇرلى مەكەمەلەر, وقۋ ورىندارى, سپورت مەكتەپتەرى, سونداي-اق, قالا تۇرعىندارى, بارلىعى 2 مىڭداي ادام قاتىستى. ەرەكشە بەلسەندىلىك كورسەتكەندەر ديپلومدارمەن, باعالى سىيلىقتارمەن ماراپاتتالدى. تەمىر قۇسايىن. دەرەك, سۋرەت: inform.kz.