قوعامدىق قابىلداۋدا – كاسىپكەرلەر

كەشە «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە «كاسىپكەرلەرگە قامقورلىق» اكتسيا­سى شەڭبەرىندە «كاسىپكەرلەردى بىرىڭعاي قابىلداۋ كۇنى» اكتسياسى بولىپ ءوتتى. شارا بارىسىندا وسى سالاعا ۇمتىلىس تانىتىپ جۇرگەن ازاماتتاردىڭ سۇرانىس-تىلەكتەرىنە جاۋاپ بەرۋ ءۇشىن «كاسىپكەرلىكتى دامىتۋ قورى» اق-تىڭ استانا قالاسىنداعى ايماقتىق فيليالىنىڭ ديرەكتورى يسلامبەك قايىربەكوۆ قابىلداۋ وتكىزدى. وعان جەكە بيزنەسىن باستاۋعا جانە ءارى قاراي جەتىلدىرۋ ءۇشىن بىرقاتار قولداۋدى قاجەت ەتەتىن كاسىپكەرلەر وزدەرىنىڭ بۇيىمتايىن ايتا كەلدى. ولاردىڭ اراسىندا ءوزىنىڭ بيزنەس مەكتەبىن اشقىسى كەلەتىندەر, تىگىن شەبەرحاناسىن كەڭەيتىپ, ارنايى تەحنيكالىق جاراقتاردى ساتىپ الۋعا جانە كەڭسەلەردى جالعا الۋ ءۇشىن قاراجات قاراستىرۋ بويىنشا كەڭەس سۇراي كەلگەندەر دە بار. بۇل رەتتە, قابىلداۋعا كەلگەن گ.تانەكە, س.توققازى ۇلى جانە ا.مۇسابەكوۆ سەكىلدى كاسىپكەرلەر «بيزنەستىڭ جول كارتاسى-2020» مەملەكەتتىك باعدارلاماسى اياسىندا جۇمىستارىن جانداندىرۋعا قانداي مۇمكىندىك بار ەكەندىگىنە قانىق بولدى. قابىلداۋ شەڭبەرىندە شاعىن جانە ورتا بيزنەس باعدارلاماسىنىڭ نەگىزگى تەتىكتەرى, ونىڭ شارتتارى مەن مىندەتتەرى, اتالعان باعدارلامانى جۇزەگە اسىرۋ بارىسىندا كوتەرىلگەن پروبلەمالاردى شەشۋ جولدارىن ىزدەۋ جانە بيزنەستى قارجىلاندىرۋعا قولجەتىمدىلىكتى ارتتىرۋ, ەكىنشى دەڭگەيلى بانكتەردىڭ نەسيەلەرى بويىنشا سىياقى تولەۋ جۇكتەمەسىن ازايتۋ, كاسىپكەرلەردى وقىتۋ جانە بيزنەس-جوسپارلارىن جاساۋ تۋرالى اقپاراتتار كەڭىنەن ايتىلدى. جەكە بيزنەسىن باستاۋعا نيەتتى اقليما قۇسايىنوۆا ءوزىنىڭ پسيحولوگيا سالاسىندا كوپ جىلدىق ەڭبەك ءوتىلى بار ەكەندىگىن جانە شەتەلدە تاعىلىمدامادان وتكەن مامان رەتىندە رۋحاني ءبىلىم بەرۋدەن باستاپ كاسىپكەرلىكتىڭ قىر-سىرىن ۇيرەتەتىن ءوزىنىڭ اۆتورلىق مەكتەبىن اشۋعا قارجىلاي كومەك قاجەتتىگىن جەتكىزدى. بۇل ماسەلەدە جەكە كاسىپكەرگە ماماندار تاراپىنان باعىت-باعدار بەرىلدى. ەندىگىدە «بيزنەستىڭ جول كارتاسى-2020» باعدارلاماسىنداعى تالاپتار نەگىزىندە كومەك كورسەتىلەتىن بولادى. جالپى العاندا, جوعارىدا ايتىپ وتكەنىمىزدەي, «بيزنەستىڭ جول كارتاسى-2020» باعدارلاماسىندا بەلگىلەنگەن كورسەتكىشتەرگە لايىق بولعان ادامدار بيزنەس باستاۋعا مەملەكەتتىك كومەك الا الادى. ايتار بولساق, كاسىپكەرلەر 16 پايىزبەن نەسيە الاتىن بولسا, ونىڭ 7 پايىزىن مەملەكەت وتەپ, قالعان 10 پايىزىن كاسىپكەر تولەسە, كەرىسىنشە, اۋىلدى جەرلەردە, اۋداندار مەن مونوقالالاردا بيزنەس تىزگىنىن قولعا العاندار ءۇشىن 16 پايىزدىق نەسيەنىڭ 10 پايىزىن مەملەكەت سۋبسيديالايدى. سونىمەن قاتار, كەپىلدەمە ماسەلەسى دە وڭتايلى جولعا قويىلىپ وتىر. اكتسياعا قاتىسۋشى كاسىپكەرلەردىڭ سۇراقتارىنا ناقتى ءارى تولىقتاي جاۋاپ بەرىلىپ, ولار الداعى جۇمىسىنا باعدار الدى. وسىلايشا قارقىندى تۇردە كەڭەس بەرۋ شاراسىن وتكىزگەن «كاسىپكەرلىكتى دامىتۋ قورى» اق وتكەن جىلى پارتيانىڭ بارلىق ايماقتىق جانە اۋماقتىق فيليالدارىندا كاسىپكەرلىك ماسەلەسى بويىنشا 2 مىڭنان استام ازاماتتى قابىلداعان. ال بيىلعى جىلدىڭ وزىندە قاڭتار ايىنىڭ ىشىندە 150-دەن استام ازامات كەڭەس بەرۋ جۇمىسىمەن قامتىلعان. سونىمەن قاتار, وتكەن جىلدىڭ 13 ناۋرىزى مەن 11 قىركۇيەگىندە «مىقتى بيزنەس – قۋاتتى مەملەكەت» اكتسياسى اياسىندا «نۇر وتان» پارتياسىنىڭ بارلىق قوعامدىق قابىلداۋ بولمەلەرىندە «بيزنەستىڭ جول كارتاسى-2020» باعدارلاماسىن جۇزەگە اسىرۋ بويىنشا «ازاماتتاردى بىرىڭعاي قابىلداۋ كۇنى» اكتسياسى وتكەن بولاتىن. اتالعان اكتسياعا بەس مىڭنان استام ازامات قاتىستى. ەلميرا ماتىباەۆا, «ەگەمەن قازاقستان».