ۇرى تەرەزەگە كەپتەلىپ قالدى

ءۇي توناپ, قالتا قاعىپ ۇيرەنگەن ۇرى­لاردىڭ ءدايىم دەگەندەرى بولىپ, ويلا­عاندارى ورىندالىپ جاتپايدى. ولاردىڭ جوسپارى وزىنە قۇرىلعان تۇزاق بولىپ, العان جىمقىرماسىنىڭ ءوزىن ءاپ-ساتتە ۇستاپ بەرەر «كوزگە» اينالىپ جاتاتىن تۇستارى از ەمەس. وسىنداي قىلمىستىق ءارى قىزىقتى وقيعالاردىڭ ءبىرى جۋىردا ماڭعىستاۋ وڭىرىندە تىركەلدى. كۇيزەلتە وتىرىپ, ەزۋ تارتتىرارلىق وقيعا ماڭعىستاۋ وبلىسىنىڭ قاراقيا اۋدانىنىڭ ورتالىعى – قۇرىق اۋىلىندا بولدى. 69 جاستاعى اۋىل تۇرعىنىنىڭ قۇقىق قورعاۋ ورىندارىنا جازعان شاعىمىنا قاراعاندا, ول كەشكە تامان ءوز اۋلاسىنا شىعىپ, قاقپالاردىڭ دۇرىس جابىلعان-جابىلماعاندىعىن تەكسەرىپ جۇرەدى. كەنەت قۇلاعىنا تەرەزە جاقتان الدەبىر داۋىس شالىنعان. ول دىبىس شىققان جاققا كەلسە, ۇيگە تەرەزە ارقىلى كىرمەك بولعان ەر ادامنىڭ تەرەزەگە سىيماي كەپتەلىپ تۇرعانىن كورەدى. ءىلىنىپ تۇرعان ۇرىنى جاقسىلاپ تۇرىپ ءبىر تەۋىپ العان ءۇي يەسى ۇيگە كىرىپ پوليتسيا شاقىرادى. ءتارتىپ ساقشىلارى كەلگەندە, ەسىكتەن بوكسەسى سىيماي قالعان «ايۋداي» بولىپ كەپتەلىپ تۇرعان ۇرى جان-دارمەنى شىعىپ, قاشىپ كەتكەن ەكەن. الايدا, پوليتسەيلەر كۇدىكتىنى دەرەۋ انىقتاپ, ۇستاپ ۇلگەرگەن. ول سول اۋىلدىڭ 32 جاستاعى تۇرعىنى بولىپ شىقتى. قازىرگى تاڭدا كۇدىكتىنىڭ ۇستىنەن سوتقا دەيىنگى تەرگەۋ جۇرگىزىلۋدە. وسىعان ۇقساس وقيعا اقتاۋ قالاسىندا دا بولعانىن اتاپ وتكەن ءجون. وبلىس ورتالىعىنىڭ 15-شاعىن اۋدانىندا ءۇي يەسى ەسىگىن اشىق تاستاپ, كورشىسىنىڭ ۇيىنە كەتەدى. كورشىسىنىڭ سۋ جاڭا تەلەديدارىن كورىپ, تاماشالاپ 20 مينۋتتا ۇيىنە ورالسا, ۇيىنە بەلگىسىز ەر ادام كىرىپ العان. ءۇي يەسىن كورگەن بويدا تۇرا قاشقان ۇرى قولىنا ۇيالى تەلەفوندى ىلە كەتەدى. دەسەك تە, اسىعىپ بارا جاتقان ول ابايسىزدا تەلەفوندى قولىنان ءتۇسىرىپ الادى. ال وندا ۇرىنىڭ ساۋساق ىزدەرى قالعان بولاتىن. وسىلايشا جەمتىگى وزىنە قۇرىلعان قاقپانعا اينالعان ۇرى ۇزاققا بارمادى – قۇقىق قورعاۋ ورىندارىنىڭ بازاسىندا ساقتالعان ساۋساق ىزىنە قاراپ انىقتاعاندا, ونىڭ بۇرىن سوتتالعان كانىگى قىلمىسكەر ەكەنى ناقتىلاندى.  گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.