قارشاداي بالانىڭ ەرلىگى

ورتتەن باۋىرلارىن امان الىپ قالعان 11 جاسار دانيار «ەرلىگى ءۇشىن» توسبەلگىسىمەن ماراپاتتالدى كوزسىز ەرلىككە بارۋ, باتىل قيمىلداپ, باتىرلىق تانىتۋ – قازاقتىڭ قانىندا بار قاسيەت. تاياۋدا ۇلتىمىزدىڭ وسى ءبىر ەرەكشەلىگىن 11 جاسار قارشاداي بالا تاعى ءبىر دالەلدەپ بەردى. اتاپ ايتقاندا, الماتى قالاسىنداعى شاعىن اۋدانداردىڭ بىرىندە تۇراتىن دانيار ساتىبالدى ەسىمدى ەرجۇرەك بالا وتقا ورانعان ۇيىنەن ءۇش بىردەي باۋىرىن امان الىپ شىعىپ, باتىرلىقتا شەك بولمايتىنىن پاش ەتتى. ونىڭ بۇل ارەكەتى لايىقتى باعاسىن الىپ, دانيار «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى. الدىمەن اتالعان وقيعاعا توقتالىپ وتەيىك. وتكەن جىلدىڭ 29 قاراشاسىندا الماتى قالاسى «ۇلجان-1» شاعىن اۋدانى تاكەجانوۆ كوشەسىندەگى جەر ۇيلەردىڭ بىرىندە ءورت شىققان. توتەنشە جاعداي كەزىندە ۇيدە دانيار مەن ونىڭ قارىنداستارى – 8 جاسار گۇلميرا, 7 جاسار دينارا جانە ءۇش جاسار دامير ەسىمدى ءىنىسى بولعان. وسى كەزدە شۇعىل شەشىم قابىلداعان دانيار قولىمەن تەرەزە اينەگىن سىندىرىپ, باۋىرلارىن دالاعا الىپ شىققان. وسى ەرلىگى ءۇشىن الماتى قالالىق توتەنشە جاعدايلار دەپارتامەنتىنىڭ وكىلى باتىر بالا وقيتىن №152 مەكتەپ-گيمنازياعا ارنايى كەلىپ, دانياردى كوپ­شىلىكتىڭ كوزىنشە ماراپاتتادى. سالتاناتتى شارا كەزىندە ەلدىڭ قوشەمەتىنەن قىسىلىپ, ۇياڭدىق تانىتقان جاس باتىر سول كۇنگى جاعدايدى قاز قالپىندا بايانداپ بەردى. ماراپاتتاۋعا كەلگەن قالالىق توتەنشە جاعدايلار دەپارتامەنتىنىڭ وكىلى باعدات شايزادا 11 جاسار بالانىڭ بۇل ەرلىگىن كەز كەلگەن ەرەسەك ادامنىڭ جاساي المايتى­نىنا نازار اۋداردى. ونىڭ ايتۋىنشا, دانيار قالا بويىنشا ەڭ جاس قۇتقارۋشى ەكەن. – مۇنداي جاستاعى بالانىڭ وسىنداي ەرلىك جاساۋى ءبىزدىڭ تاجىريبەمىزدە ءبىرىنشى رەت كەزدەسىپ وتىر. باۋىرلارىن ايت­پاعاندا, دانياردىڭ ءوزى دە ءالى ويىن بالا­سى ەكەنىن ەسكەرسەك, راسىمەن ەرىكسىز باسى­مىزدى شايقاۋعا ءماجبۇرمىز. سەبەبى, مۇنداي جاعدايدا ەرەسەك جان­داردىڭ ءوزى شەشىم قابىلداۋعا قينالىپ جاتادى. ال دانيار باۋىرلارى ءۇشىن كوز­سىز ەرلىككە بارىپ وتىر, – دەدى دەپار­تا­مەنت وكىلى. ءيا, بۇگىندە باۋىرلارىنىڭ, اتا-انا­سىنىڭ جانە مەكتەبىنىڭ ماقتانىشىنا اينالعان دانياردىڭ بۇل ارەكەتى كوزسىز ەرلىك ەكەنى ءسوزسىز. قازاقتىڭ «جۇرەگىنىڭ تۇگى بار» دەگەن قاناتتى ءسوزى دە وسىنداي كەزدە ايتىلسا كەرەك-ءتى. ەلامان قوڭىر, «ەگەمەن قازاقستان».