استانا. 2 اقپان. 1 اقپان كۇنى الماتى قالاسىندا وتاندىق "مەزەت يلي پروستو جيزن" اتتى جاڭا كوركەم ءفيلمنىڭ تۇساۋكەسەرى ءوتتى. بۇل تۋرالى egemen.kz ءتىلشىسى حابارلادى.
قازاقستاندىق تولىق مەتراجدى ءفيلمنىڭ رەجيسسەرى اقجول ءابىلوۆتىڭ ايتۋىنشا, كينونىڭ يدەياسى ستسەناريست ارداق قارىقبولوۆامەن بىرلەسكەن اۆتورلىقتا جاسالعان. كينوتاسپانى جاساۋ قازاق ۇلتتىق ونەر ۋنيۆەرسيتەتى ستۋدەنتىنىڭ كۋرستىق جۇمىس ءۇشىن تاقىرىپ ىزدەۋىنەن وربىگەندىكتەن, باستاپقىدا فيلم قىسقا مەتراجدى تۋىندى رەتىندە ويلاستىرىلعان ەكەن. الايدا وقيعا سونى سيۋجەتتەرمەن, كەيىپكەرلەرمەن تولىقتىرىلا كەلە, ستسەناري شىنايى ءومىر جاعدايلارىنا نەگىزدەلگەن فيلمگە اينالعان.
رەجيسەردىڭ ايتۋىنشا, ءفيلمنىڭ مازمۇنى وتە قاراپايىم. سوندىقتان ول ءوزىنىڭ شىنايىلىعىمەن ءارى ناقتىلىعىمەن كورەرمەندى باۋراپ الادى. ءفيلمنىڭ باسىندا كورەرمەندەرگە كارتينانىڭ باستى كەيىپكەرى – اسقار ەسىمدى ازامات تانىستىرىلادى. ازامات بويداق ءارى تابىستى جىگىت بولادى. ول دوستىقتى باعالامايتىن, ماحابباتتىڭ نە ەكەندىگىن تۇسىنبەيتىن جانە اينالاداعى ادامداردى سىيلامايتىن جىگىت بولىپ شىعادى. كۇندەردىڭ ءبىر كۇنىندە اسقار كەنەت ەسىن جوعالتادى. ودان كەيىن ۇنەمى اۋرۋحانادا جاتۋ, ەمدەلۋ, مەديتسينالىق تەكسەرىستەردەن ءوتۋ ونى تىپتەن ابىرجىتىپ جىبەرەدى. دارىگەرلەر وعان ۇدەمەلى مي ىسىگى دياگنوزىن قويادى. سودان اسقار ءبىر اي عانا ءومىرى قالعانىن ەستىپ, تەرەڭ كۇيزەلىسكە تۇسەدى. ءسويتىپ, ىشىمدىككە سالىنىپ ءجۇرىپ, ول ءبىر كۇنى تاعدىردىڭ تالكەگىمەن الدەبىر اۋىلعا تاپ بولادى. مىنە, وسى ەلدى مەكەندە اسقار ەرەكشە ءبىر وقيعاعا كەزىگەدى. سونىڭ ارقاسىندا اسقار مۇلدەم وزگەرەدى, قارىم-قاتىناستى, ءومىردى جانە ماحابباتتى باعالاي باستايدى. ءفيلمنىڭ اقىرى ودان دا قىزىقتى, وعان كورەرمەندەر وزدەرى تاماشالاعاندا كۋا بولادى. "مەزەت يلي پروستو جيزن" ءفيلمىنىڭ كورسەتىلىمى 4 اقپاندا باستالادى دەپ جوسپارلانىپ وتىر.
"مەزەت يلي پروستو جيزن" ءفيلمى –ەلىمىزدەگى ەڭ جاس رەجيسسەردىڭ تىرناقالدى دۇنيەسى, العاشقى تولىق مەتراجدى جۇمىسى. فيلمدەگى باستى ءرولدى تانىمال وتاندىق ءارتىس – نۇرجان سادىبەكوۆ وينايدى. سونىمەن قاتار, كورەرمەندەر فيلمدە نۇرجان تۇتوۆ, گۇلباھرام بايبوسىنوۆا, المات ساقاتوۆ, ەردەن تەلەمىسوۆ, ازات سەيتمەتوۆ سەكىلدى ارتىستەردى كورە الادى.
داستان كەنجالين.
دەرەك, سۋرەت: egemen.kz
