اقتوبەدە «قارۋ» جەدەل-پروفيلاكتيكالىق ءىس-شاراسى باستالدى

اقتوبە. 2 اقپان. اقتوبە وبلىسىنداعى جەدەل جاعدايدى ساۋىقتىرۋ, اتىس قارۋىن, جارىلعىش زاتتاردى قولدانۋ ارقىلى جاسالاتىن قىلمىستاردى اشۋ جانە الدىن الۋ, سونداي-اق, قارۋ يەلەرىن تۇرعىلىقتى جەرى بويىنشا تەكسەرىپ, ولاردىڭ قارۋدى پايدالانۋ, ۇستاۋ جانە ساقتاۋ تالاپتارىن ورىنداۋىن تەكسەرۋ ماقساتىندا وسى جىلدىڭ 1-29 اقپانى ارالىعىندا «قارۋ» جەدەل-پروفيلاكتيكالىق ءىس-شاراسى وتكىزىلۋدە. بۇل تۋرالى egemen.kz ءتىلشىسى حابارلادى. اكتسيا بارىسىندا زاڭسىز اينالىمداعى اتىس قارۋلارىن, وق-دارىلەردى, جارىلعىش زاتتاردى انىقتاۋ جانە الۋ جۇزەگە اسىرىلادى. سونىمەن قاتار, قالادا, ەلدى مەكەندەردە, اۋىل- ايماقتاردا, سونداي-اق, جەكە قوجالىقتاردا ازاماتتاردان زاڭسىز اينالىمنان اتىس قارۋلارىن, وق-دارىلەردى, جارىلعىش زاتتاردى انىقتاۋ جانە الۋ جۇرگىزىلۋدە. قارۋ يەلەرى تۇرعىلىقتى جەرى بويىنشا تەكسەرىلىپ, ولاردىڭ قارۋدى پايدالانۋ, ۇستاۋ جانە ساقتاۋ تالاپتارىن ورىنداۋى قاداعالانۋدا. نەگىزگى ماگيسترالدار مەن ەلدى مەكەندەر جولدارىنان ءوتىپ جاتقان كولىكتەر تەكسەرىلىپ جاتىر. بارلىق انىقتالعان زاڭ بۇزۋشىلىقتار بويىنشا زاڭ تالاپتارى مۇلتىكسىز ورىندالىپ, زاڭ بۇزۋشىلارداعى قارۋلار مەن وق-دارىلەر تاركىلەنىپ اكىمشىلىك جاۋاپكەرشىلىككە تارتىلاتىن بولادى. قازىرگى تاڭدا وبلىس بويىنشا 13 133 قارۋ تىركەلگەن, ونىڭ ىشىندە ءيىر ويىقتى – 821, تەگىس ۇڭعىلى – 9110, گازدى – 785, پنەۆماتيكالىق – 16, سۋىق – 13 جانە ەلەكترلى 2 قارۋ بار. ولاردىڭ 2 386 – قىزمەتتىك جانە 10 747 ازاماتتىق قارۋ ەكەنىن دە اتاپ وتكەن ءجون. ساتىبالدى ءساۋىرباي. دەرەك: egemen.kz. سۋرەت: aktobeinfo.kz.