پاۆلودار. 2 اقپان. پاۆلودار قالاسىنداعى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتە «ماڭگىلىك ەل جاستارى – يندۋسترياعا» – «سەرپىن-2050» مەملەكەتتىك باعدارلاماسى رەسپۋبليكالىق ۇيلەستىرۋ كەڭەسىنىڭ توراعاسى مۇرات ابەنوۆ وسى باعدارلاما بويىنشا ءبىلىم الىپ جۇرگەن ستۋدەنتتەرمەن كەزدەستى. بۇل تۋرالى ۋنيۆەرسيتەتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
كەڭەس توراعاسى وقۋ ورنىنىڭ تىنىس-تىرشىلىگىمەن, ماتەريالدىق-تەحنيكالىق بازاسىمەن تانىستى.
بيىلعى وقۋ جىلىندا اتالعان باعدارلاما بويىنشا ەلىمىزدىڭ وڭتۇستىك وڭىرلەرىنەن كەلگەن 300-گە جۋىق گرانت يەگەرلەرى ءبىلىم الۋدا. سەرپىندىكتەر نەگىزىنەن تەحنيكالىق ماماندىقتاردى يگەرۋدە. مۇرات ابەنوۆتىڭ ايتۋىنشا, باعدارلاما سولتۇستىكتە ماماندار تاپشىلىعىن تومەندەتىپ, وڭتۇستىك وڭىرلەردەگى جۇمىسسىزدار سانىن ازايتادى. الداعى ۋاقىتتا ۋنيۆەرسيتەتتە «سەرپىن-2050» باعدارلاماسىمەن ءبىلىم الىپ جۇرگەن ستۋدەنتتەر ءۇشىن «بيزنەس ورتالىق» قۇرىلماق. كەزدەسۋدە ۋنيۆەرسيتەت رەكتورى ارىن ورساريەۆ ستۋدەنتتەردى جوعارى دەڭگەيلى ءبىلىم الۋعا شاقىردى.
ايتا كەتەيىك, باعدارلاما بويىنشا ءبىلىم الىپ جۇرگەن ستۋدەنتتەر جاتاقحانامەن قامتاماسىز ەتىلگەن.
فاريدا بىقاي.
دەرەك: egemen.kz.
سۋرەت: رۋفينا تورپيششەۆا.
