وڭىرارالىق ساۋداعا سۇبەلى ۇلەس

قازاقستان اۋماعى ارقىلى قىتاي – يران باعىتىندا تۇڭعىش كونتەينەرلىك پويىز جىبەرىلدى يۆۋ قالاسىندا (شىعىس قىتاي, چجەتسزيان پروۆينتسياسى) قازاقستان اۋماعى ارقىلى يرانعا ترانزيتتىك كونتەينەرلىك پويىزىن جونەلتۋ سالتاناتى وتكىزىلدى, دەپ حابارلادى «قتج» ۇك» اق-تىڭ ءباسپاسوز قىزمەتى. سالتاناتتى شاراعا يۆۋ قالاسىنىڭ مەرى شەن تسزيۋ پين مەن قىتاي تەمىرجول اكىمشىلىگىنىڭ باسشىلارى, «قازاقستان تەمىر جولى» ۇك» اق Translnvest Group حالىقارالىق لوگيستيكالىق حولدينگىنىڭ وكىلدەرى قاتىستى. جاڭا كونتەينەرلىك باعىت قىتاي, قازاقستان, تۇرىكمەنستان, يران تەمىرجولدارى اكىمشىلىكتەرىنىڭ بىرلەسكەن ۇيىمداستىرۋ شارالارىنىڭ ناتيجەسىندە جۇزەگە اسىرىلدى. بۇل جوبا شىعىس قىتايدان پارسى شىعاناعى ەلدەرىنە جۇكتەردى جەدەل جەتكىزۋگە ارنالعان العاشقى لوگيستيكالىق شەشىم بولىپ تابىلادى. پويىز باعىتى قىتاي تەمىرجولى, الاشاڭقاي – دوستىق شەكارالىق بەكەتى, قازاقستاننىڭ جاڭا تەمىر­جول جەلىسى (جەزقازعان – بەينەۋ, وزەن – بولا­شاق), ءارى قاراي تۇرىكمەنستان جەلىسىمەن يران­نىڭ تەھران قالاسىن جالعايدى. پويىز قۇرامى ارالاس جۇكتەر تيەلگەن 40 فۋتتىق كونتەينەرلەردەن تۇرادى. باعىتتىڭ جالپى ۇزىندىعى 9 مىڭ شاقىرىمنان استام. تەمىرجولمەن جۇك 10 تاۋلىك جۇرسە, وسى ارالىقتى تەڭىز ارقىلى 25-30 كۇن جۇرەدى. قازاقستاننىڭ جاڭا كولىكتىك-لوگيستيكالىق ينفراقۇرىلىمى باعىتتى بارىنشا قىسقارتىپ, جۇكتى جەتكىزۋ مەرزىمىن جەدەلدەتىپ, ەۋرازيا قۇرلىعىنداعى ايماقتىق ساۋدانىڭ سەرپىندى دامۋىنا وڭ ىقپال ەتەدى. كونتەينەرلىك تاسىمالدى دامىتۋ ەلىمىزدىڭ ترانزيتتىك الەۋەتىن ەسەلەي ارتتىرىپ, باسەكەلەستىككە قابىلەتتىلىگىن دە كوتەرە تۇسەدى.