كۇي بولىپ توگىلگەن مۇرا

عازيزا جۇبانوۆا اتىنداعى وبلىستىق فيلارمونيادا وتكەن «اقتوبە ءوڭىرىنىڭ مۋزىكالىق مۇراسى» اتتى اۋديوجيناقتىڭ تۇساۋكەسەرىنە ونەرسۇيەر قاۋىم كوپ جينالدى. اۋديوجيناقتىڭ العىسوزىن وبلىس اكىمى بەردىبەك ساپارباەۆ جازعان. جيناققا اقتوبە جەرىندە تۋعان, ءومىر سۇرگەن بەلگىلى اقىندار مەن حالىق كومپوزيتورلارىنىڭ شىعارمالارى ەنگەن. قازاق حاندىعىنىڭ 550 جىلدىعىنا وراي شىعارىلعان ءان مەن كۇي جيناعىندا 12 سD ديسك بار. ولارعا 213 شىعارما جيناقتالىپتى. اقتوبە ءوڭىرى مۋزىكالىق مۇراعا باي. جيناققا اقتوبە توپىراعىندا ءىزى قالعان ايگىلى اسان قايعى, موڭكە تىلەۋ ۇلى, شەرنياز جارىلعاس ۇلى, اقتان كەرەي ۇلى, ابۋباكىر كەر­دەرى سارىشولاق بورانباي ۇلى, سارى باتاق ۇلى, قىزىل تۇر­دالى ۇلى, تارازى كالەنقىزى, تاڭىربەرگەن مولداباي, نۇرپەيىس بايعانين سياقتى جىراۋلار مەن حالىق كومپوزيتورلارىنىڭ شى­عارمالارى, ءوڭىردىڭ ءان شەبەر­لەرى مەن تەرمەشىلەرى ورىنداۋىندا كەڭ تارالعان ءداستۇرلى حالىق اندەرى, كونەدەن كەلە جاتقان حالىق كۇيلەرى مەن داۋلەسكەر كۇيشى قازانعاپتىڭ جانە ونىڭ ءىزباسارلارىنىڭ كۇي­لەرى توپتاستىرىلعان. سونى­مەن قاتار, قازىرگى زامانعى قا­زاق مۋزىكا ونەرىنىڭ نەگىزىن قا­لاۋ­شى, اكادەميك احمەت جۇبانوۆتىڭ, اقىن-كومپوزيتور باكىر تاجىباەۆتىڭ شىعارعان اندەرى, كورنەكتى جەرلەس اقىندار ق.شاڭعىتباەۆ, س.جيەنباەۆ, م.اقداۋلەت ۇلى, ە.اشىقباەۆ جانە باسقالاردىڭ سوزدەرىنە جازىلعان تانىمال كومپوزيتورلار مەن جەرگىلىكتى سازگەرلەردىڭ شىعارمالارى ەنگىزىلگەن. مادەني مۇرانىڭ تۇساۋ­كەسەرىندە ءسوز العان قازاقستاننىڭ مادەنيەت قايراتكەرى ەركىن قۇرمانبەكوۆ, قازاقستاننىڭ ەڭ­بەگى سىڭگەن مادەنيەت قايرات­كەرى, كومپوزيتور قايىرعالي قوجانباەۆ ءوڭىردىڭ مۋزىكالىق مۇراسىن توپتاستىرىپ, اۋديو­جيناق شىعارۋ ارقىلى ۇلكەن ءىس تىندىرىلعانىن اتاپ ءوتتى. سونداي-اق, بۇل وڭىردە ءومىر سۇرگەن ونەر يەلەرىنىڭ باي مۇرالارىنىڭ جوعالماۋىنا, كەيىنگى ۇرپاققا ساف التىنداي تازا كۇيىندە سا­­باقتاسا جەتۋىنە العىشارت جا­ساي­تىنىن جەت­كىزدى. اقىن-جى­راۋ نۇرپەيىس باي­عانيننىڭ ۇلى, كۇيشى مومىن بايعانين ءما­دەني مۇرانىڭ تۇساۋ­كەسەرىنە جي­نالعاندارعا باتاسىن بەرىپ, قازانعاپتىڭ كۇيلەرىن ورىندادى. تالانتتى كۇيشى جايلاۋ اسىلحانوۆتىڭ ورىنداۋىنداعى قازانعاپتىڭ ۇمىتىلىڭقىراپ بارا جاتقان «نار يدىرگەن» كۇيى كورەرمەندەردىڭ كوڭىلىن تەرەڭ تەبىرەنىسكە بولەدى. ساتىبالدى ءساۋىرباي, «ەگەمەن قازاقستان». اقتوبە وبلىسى.