مۇسىلمان قىزى شىرقاعان «اۆە ماريا»

رەسەيدىڭ تۇمەن وبلىسىنداعى توبولسك قالاسىندا ورنالاسقان «اۋليە ۇشتىك» حرامىندا مۇسىلمان قىزى زەمفيرا شاريپوۆا شۋبەرتتىڭ, باحو-گۋنونىڭ, اركادەلتتىڭ جانە كاچانيدىڭ «Ave Maria» دەپ اتالعان تۋىندىلارىن ورىنداپ, روجدەستۆوعا جينالعان حريس­تيان قاۋىمعا وزىندىك ءبىر سىي-سياپات جاسادى. ال ورگان مەن ۆوكالدى مۋزىكا كونتسەرتى كەشىنە كاتوليك, پراۆوسلاۆيە جانە مۇسىلمان دىندەرىنىڭ وكىلدەرى قاتىستى. سوڭىندا حرام ناستوياتەلى داريۋش ستانچيك جوعارى دەڭگەيدەگى مۋزىكالىق ونەردىڭ ادامداردى جاقىنداستىراتىنىن ايتا كەلىپ, وسىنداي قىز بەن نەمەرە تاربيەلەگەندەرى ءۇشىن زەمفيرانىڭ اتا-اناسى مەن اجەسىنە العىس سەزىمىن ءبىلدىردى. قالا باسشىسى ۆلاديمير مازۋر كونتسەرت كەزىندە ءوزىنىڭ جانى راحات تاۋىپ, وزگەشە ءبىر كۇي كەشكەنىن جەتكىزە تۇرىپ, وسىنداي ۇيلەسىمدىلىكتى بۇكىل قالا جۇرتىنا تىلەدى. – زەمفيرا شاريپوۆا – ءبىزدىڭ توبولسكىدەگى ءتىلشىمىز, – دەدى «مۋسليم-ينفو» گازەتىنىڭ رەداكتورى كاليل كابدۋلۆاحيتوۆ. – ول – توبولسكىدە حح عاسىردىڭ باسىندا پروگرەس­سيۆتى كوزقاراستاعى مۇسىلماندار قاۋىم­داستىعىنىڭ نەگىزىن قالاعان حيزرالي باكيەۆتىڭ شوبەرەسى. وتە تالانتتى قىز, ساياحاتقا شىققان­دى جاقسى كورەتىن ىزدەنىمپاز جاس. ول وسى كەزگە دەيىن مىسىردا, امىرلىكتە, تۇركيادا, وزبەكستاندا, ازەربايجاندا, قازاقستاندا, ۋكراينادا, سونداي-اق, رەسەيدىڭ كوپتەگەن ايماقتارىندا بولىپ ۇلگەرگەن. ەندى بيىل يران مەن تاجىكستانعا بارىپ قايتۋدى ارمانداپ ءجۇر. زەمفيرا تەك ءبىزدىڭ گازەتىمىزدى عانا ەمەس, سونداي-اق, Umma72.ru اتتى پورتالىمىزدى دا مۇسىلمان قاۋىمى جاڭالىقتارىمەن قامتاماسىز ەتىپ, ساياحاتتارى بارىسىنان جاقسى سۋرەتتەمەلەر جازىپ تۇرادى. ايتا كەتەيىك, «اۆە ماريا» (لاتىنشادان اۋدارعاندا, «قۋان, ماريا») – حريستيان ءدىنىنىڭ تامسىلدەرىنە ساي, گاۆريل (جابىرەيىل) پەرىشتەنىڭ اۋليە مارياعا يسۋستى بوسانىپ جاتقان كەزىندە يگىلىك پەن جاقسىلىق تىلەپ ايتقان تىلەگىنىڭ ءبىرىنشى ءسوز تىركەسى. دامير قوجامقۇل.