ەلباسى – «نۇر وتان» پارتياسىنىڭ توراعاسى نۇرسۇلتان نازارباەۆتىڭ پارتيا
سەزىندەگى بايانداماسى تۋرالى وتانداستارىمىزدىڭ ورتاق ويى وسىنداي
زاۋرە ءجۇسىپوۆا, استانا قالاسىنداعى №59 مەكتەپ-ليتسەيىنىڭ ديرەكتورى, استانا قالالىق ءماسليحاتىنىڭ دەپۋتاتى: – مەن 2009 جىلدان بەرى «نۇر وتان» پارتياسىنىڭ مۇشەسىمىن. پارتيامىزدىڭ ەلىمىزدى دامىتۋعا, حالقىمىزدىڭ الەۋمەتتىك جاعدايىن كوتەرۋگە بايلانىستى اتقارىپ وتىرعان جۇمىسى وتە اۋقىمدى. تاۋەلسىزدىگىمىزدىڭ تۇعىرلى بولۋىنا لايىقتى ۇلەسىن قوسىپ كەلە جاتقان ءبىزدىڭ ۇيىمنىڭ الدىندا ءۇلكەن مىندەتتەر تۇر. ول پارتيامىزدىڭ وسى سەزىندە قابىلدانعان سايلاۋالدى باعدارلاماسىندا اتاپ كورسەتىلگەن. مەنىڭشە, بۇعان دەيىن دە ەل كوڭىلىنەن شىعىپ كەلگەن پارتيا الداعى ۋاقىتقا بەلگىلەنگەن مىندەتتەردى ءوز دەڭگەيىندە ورىندايدى دەپ سەنەمىن. سەزد بارىسىندا ەلباسى نۇرسۇلتان نازارباەۆ ەلىمىز بويىنشا اتقارىلىپ جاتقان قىرۋار جۇمىستاردى, سونداي-اق, الدا تۇرعان مىندەتتەردى ناقتىلاپ ايتىپ بەردى. بۇدان ءبىز ەلىمىزدىڭ دۇرىس جولمەن كەلە جاتقانىن كورە الامىز. بۇل ورايدا ءبىزدىڭ پارتيامىز ءوز جۇمىسىن ساليقالى تۇردە جۇرگىزە بەرەدى دەپ ويلايمىن. مارات توياسوۆ, «نۇر وتان» پارتياسى باتىس قازاقستان وبلىسى قازتالوۆ اۋداندىق فيليالى توراعاسىنىڭ ءبىرىنشى ورىنباسارى: – «نۇر وتان» پارتياسىنىڭ حVII cەزىنەن جاقسى اسەر الدىم. ويتكەنى, وسىناۋ القالى جيىندا تاۋەلسىز ەلىمىزدىڭ بۇگىنى مەن ەرتەڭى تۇرعىسىندا كوپتەگەن ماسەلەلەر ايتىلدى. اسىرەسە, ەلباسى نۇرسۇلتان نازارباەۆتىڭ سويلەگەن ءسوزى كوپتىڭ كوڭىلىنەن شىقتى. جالپى, سەزدە ەلىمىزدىڭ ەكونوميكالىق دامۋىنا, حالقىمىزدىڭ تۇرمىسىن ودان ءارى جاقسارتا تۇسۋگە قاتىستى جاعداياتتاردىڭ كەڭىرەك قامتىلعانى پارتيامىزدىڭ نەگىزگى ماقسات-مۇددەسىن ۇعىندىرا تۇسكەندەي. سونداي-اق, پارتيامىزدىڭ داۋىسقا سالۋ ناتيجەسىندە قابىلدانعان سايلاۋالدى باعدارلاماسىندا ورىندى ماسەلەلەردىڭ تەرەڭدەي قامتىلۋى كوڭىلگە جىلىلىق ۇيالاتتى. قورىتا ايتقاندا, ءبىزدىڭ پارتيامىز ءوزىنىڭ الداعى ۋاقىتتا اتقاراتىن جۇمىستارىن ءوز دەڭگەيىندە پىسىقتاپ الدى. ەندى اۋىزبىرشىلىكپەن العا جىلجۋىمىز كەرەك. ومىرزاق مەلدەحانوۆ, «نۇر وتان» پارتياسى شىمكەنت قالالىق فيليالىنىڭ توراعاسى: – «نۇر وتان» پارتياسىنىڭ حVII سەزىنىڭ ءوتۋىن ەلىمىز ءۇشىن ۇلكەن وقيعا دەپ ەسەپتەيمىن. ويتكەنى, سەزدە ەلدىك مۇددە, كەمەل كەلەشەك جونىندە جاقسى ايتىلدى. بارشامىز كۋا بولعانداي, ەلباسى نۇرسۇلتان نازارباەۆ القالى جيىن بارىسىندا مەملەكەتىمىزدىڭ الدىندا تۇرعان اۋقىمدى مىندەتتەردى تاعى ءبىر پىسىقتاپ, قاي باعىتپەن ءجۇرۋىمىز كەرەك ەكەنىن ناقتىلاپ بەردى. جالپى, سەزد جوعارى دەڭگەيدە ءوتتى. اسىرەسە, جيىن بارىسىندا ءبىراۋىزدان قابىلدانعان پارتيانىڭ سايلاۋالدى باعدارلاماسى كەلەشەككە دەگەن سەنىمىمىزدى نىعايتا ءتۇستى دەپ ەسەپتەيمىن. باعدارلامادا حالىقتىڭ الەۋمەتتىك جاعدايىنا قاتىستى ماسەلەلەرگە باسىمدىق بەرىلگەن. بۇل ءوز كەزەگىندە «نۇر وتان» پارتياسىنىڭ ەل الدىنداعى جاۋاپكەرشىلىگىن ارتتىرا تۇسەدى دەپ ويلايمىن. ەلىمىزدىڭ ماڭدايالدى پارتياسى وسى باعىتىنان جاڭىلماي, وتانىمىزدىڭ ودان ءارى كوركەيۋىنە اتسالىسا بەرەدى دەپ سەنەمىن. جاڭبىرباي دارىباەۆ, «نۇر وتان» پارتياسى ق.ساتباەۆ قالالىق فيليالى توراعاسىنىڭ ءبىرىنشى ورىنباسارى: – ماڭىزدى شەشىمدەر قابىلدانعان پارتيامىزدىڭ XVII cەزىنە قاتىسقانىما وتە قۋانىشتىمىن. سەزد بارىسىندا «نۇر وتان» پارتياسىنىڭ حالىققا جاقىن, تۇعىرى بەرىك ۇيىم ەكەنى تاعى ءبىر دالەلدەندى. جيىندا ەل كۇتكەن ءسوز ايتىلدى. مەملەكەت باسشىسى, پارتيا توراعاسى نۇرسۇلتان نازارباەۆتىڭ ەلدىككە شاقىرعان, ىنتىماق پەن بىرلىكتى تۋ ەتىپ, العا جىلجۋعا ۇندەگەن ءسوزى كوڭىل تەربەتتى. سەزدە قارالعان ماسەلەلەر تەك پارتيا ءۇشىن عانا ەمەس, ەلىمىز ءۇشىن دە ماڭىزدى ەكەنى داۋسىز. مەنىڭ ويىمشا, پارتيا ءوز الدىنا قويعان مىندەتىن ابىرويمەن ورىنداپ شىعادى. ويتكەنى, ءبىزدىڭ پارتيامىزدىڭ ەلمەن ەتەنە جۇمىس ىستەۋدە تاجىريبەسى مول. بۇل – «نۇر وتان» پارتياسىنىڭ باستى ەرەكشەلىكتەرىنىڭ ءبىرى. اسەل جانداۋلەتوۆا, «جاس وتان» جاستار قاناتىنىڭ مۇشەسى: – ءوزىم «استانا-وپەرا» تەاترىندا كورەرمەندەرگە قىزمەت كورسەتۋ دەپارتامەنتىنىڭ ديرەكتورى بولىپ ىستەيمىن. سەزدە «نۇر وتان» پارتياسىنىڭ اتىنان, مەنىڭشە, ەڭ لايىقتى ادامدار كانديداتتىققا ۇسىنىلدى دەپ ويلايمىن. سونىڭ ىشىندە, بەكبولات تىلەۋحان, قايرات نۇرتاس سياقتى ءانشىلەر دە بار. مەن ولاردىڭ دەپۋتات بولۋىنا تىلەكتەسپىن. پارلامەنتتە ونەر ادامدارىنىڭ بولعانى وتە ماڭىزدى. ويتكەنى, سالانىڭ پروبلەمالارىن ولار جاقسى بىلەدى. سونىمەن قاتار, مەن پرەزيدەنت ن.نازارباەۆتىڭ سوزىنەن ۇلكەن اسەر الدىم. ونىڭ قازاقستاندا تاپقان بايلىقتارىڭدى ەلىمىزدىڭ دامۋى ءۇشىن وسىندا ينۆەستيتسيا رەتىندە سالىپ, جەكەشەلەندىرۋ نىساندارىن ساتىپ الىڭدار دەپ وليگارحتارعا ارناعان ءسوزى ۇنادى. ەگەر پاتريوتتىق سەزىمدەرى بولسا, ولار وسىدان كەيىن وزدەرىنىڭ قاراجاتتارىن ەلىمىزدىڭ ەكونوميكاسىنا قۇيار دەگەن ۇمىتتەمىن. سەرىك ساپيەۆ, وليمپيادا چەمپيونى: – بەس ينستيتۋتتىق رەفورما شەڭبەرىندە «100 ناقتى قادام» ۇلت جوسپارىن جۇزەگە اسىرۋ ارقىلى ەلىمىزدىڭ وركەندەۋىنە جول سالۋ كەرەكتىگىن ەلباسى ەرەكشە مىندەت ەتىپ الدىمىزعا قويىپ وتىر. وسى تۇرعىدان كەلگەندە, پارتيا وسى بەس باعىت بويىنشا ناقتى قادامدار جاساپ, الدا تۇرعان كۇردەلى دە ماڭىزدى ماسەلەلەردى شەشۋگە بار كۇش-جىگەرىن سالاتىنى ايتپاسا دا تۇسىنىكتى. ەگەر مەن دەپۋتاتتىققا ۇسىنىلىپ جاتسام, ارينە, قولىمنان كەلگەننىڭ بارلىعىن جاسايمىن. اسىرەسە, سپورتقا قاتىستى زاڭنامالاردى جەتىلدىرۋگە اتسالىساتىن بولامىن. اتاپ ايتقاندا, بۇقارالىق سپورت تۇرلەرىن دامىتۋعا, سونىڭ ىشىندە جاسوسپىرىمدەر سپورتىن جەتىلدىرۋگە كۇش سالار ەدىم. قازىرگى كەزدىڭ وزىندە ەلدىڭ بولاشاعى جارقىن بولۋى ءۇشىن قولىمنان كەلگەن جۇمىستاردى اتقارۋ ۇستىندەمىن. باقىتجان ەرتاەۆ, گەنەرال-لەيتەنانت, حالىق قاھارمانى: – بۇل شىن مانىندە تاريحي وقيعا بولدى. «نۇر وتان» پارتياسى – ءبىزدىڭ ەلىمىزدەگى ەڭ بەدەلدى, ەڭ ىقپالدى ساياسي ۇيىم, ەلباسىنىڭ پارتياسى. سوندىقتان, ونىڭ قابىلداعان شەشىمدەرىنىڭ حالقىمىز ءۇشىن ماڭىزى زور. بۇگىن الەم ۇلكەن ساياسي جانە ەكونوميكالىق داعدارىستا تۇر. ونىڭ بىزگە تيگىزىپ جاتقان كەلەڭسىز اسەرى دە جەتكىلىكتى. بىزگە ەلباسى دا ونى ۇنەمى ايتىپ وتىرادى. وسىنداي قيىندىقتان دا ەلىمىز ءبىرتۇتاس بولىپ, «ءبىر جاعادان باس, ءبىر جەڭنەن قول شىعارعان» بەرىك بىرلىكپەن عانا شىعا الادى. ەلباسى نۇرسۇلتان نازارباەۆتىڭ جانىنا توپتاسىپ, ءمونوليتتى بىرلىكتە بولساق قانا قيىندىقتاردى جەڭەمىز. «نۇر وتان» پارتياسى دا ەلدى وسى جولعا باستاپ وتىر. سەزدەگى ەلباسىنىڭ ءسوزى دە نەگىزىنەن وسى باعىتتا ءوربىدى. بىزگە, ەڭ باستىسى, تىنىشتىق, ەلدىڭ قاۋىپسىزدىگى كەرەك. ءبىزدىڭ اسكەري الەۋەتىمىز ونى ساقتاۋعا قابىلەتتى. ءبىز تەرروريزم سياقتى كەلەڭسىز قۇبىلىستاردى تۇنشىقتىرۋعا دايىنبىز. شاربان تايمۋللينا, پەتروپاۆل قالاسىنداعى ءبىلىم قىزمەتكەرلەرى بىرلەستىگى «نۇر وتان» پارتياسى باستاۋىش ۇيىمىنىڭ حاتشىسى: – مەن ءحVىى سەزد شەشىمدەرىنىڭ حالقىمىزدىڭ ءال-اۋقاتىن ارتتىرۋعا تيگىزەتىن ىقپالى كوپ بولادى دەپ ويلايمىن. ەلباسى ن.نازارباەۆ بىزدەگى قىمباتشىلىقتاردىڭ نەگىزى جوق ەكەنىن ايتتى. ويتكەنى, شيكىزاتتاردىڭ ءبارى تەڭگەگە ءوزىمىزدىڭ ىشىمىزدەن الىنادى. ەندەشە, دوللار قىمباتتادى ەكەن دەپ ءوندىرىسشىلەر ءوز تاۋارلارىن نەگە قىمباتتاتۋى كەرەك؟ – پرەزيدەنتتىڭ ءبىلىم سالاسى قىزمەتكەرلەرىنىڭ الدىنا قويىپ وتىرعان تالاپتارى وتە ورىندى. ءبىز بىلىكتى ۇرپاق تاربيەلەپ, ءبىلىمدى جاستار وسىرۋدە بەلسەندى قىزمەت ەتۋگە ءتيىسپىز. ءبىزدىڭ باستاۋىش ۇيىمىمىزدىڭ قىزمەتكەرلەرى بۇل تالاپتى قولدايدى جانە بيىك تابىستارعا جەتۋ جولىندا جان اياماي ەڭبەكتەنۋدە. بيىل ەڭبەكاقىمىز دا كوتەرىلىپ, قاتتى قۋانىپ قالدىق. ەندى تەك ەڭبەگىمىزدى ەسەلەي بەرۋىمىز كەرەك. ماحسەتباي سەرىكباەۆ, پارتيانىڭ اقمولا وبلىسى ەگىندىكول اۋداندىق فيليالى توراعاسىنىڭ ءبىرىنشى ورىنباسارى: – بۇگىن الەمدە كۇردەلى جاعداي قالىپتاسىپ وتىر. ەكونوميكالىق جاعىنان باسقا ەلدەرمەن تىعىز قارىم-قاتىناس ورناتقان قازاقستانعا دا ونىڭ اسەرى بار. ايتسە دە, ەلىمىزدە داعدارىستى ەڭسەرۋگە بايلانىستى شارالار قابىلدانىپ, «100 ناقتى قادام» ۇلت جوسپارىن جۇزەگە اسىرۋ بويىنشا جۇمىستار جۇرگىزىلۋدە. مەملەكەت تاراپىنان جۇزەگە اسىرىلىپ جاتقان رەفورمالار وسىنىڭ دالەلى. پارلامەنت ءماجىلىسىنىڭ كەزەكتەن تىس سايلاۋىن وتكىزۋ دە داعدارىس كەزىندەگى قابىلدانعان ءتيىمدى شەشىمنىڭ ءبىرى بولدى. «نۇر وتان» پارتياسىنىڭ سايلاۋالدى باعدارلاماسى «قازاقستان-2021. بىرلىك! تۇراقتىلىق! جاسامپازدىق!» دەپ اتالۋى بەكەردەن بەكەر ەمەس. ويتكەنى, بىرلىگىمىز مىقتى بولىپ, تۇراقتىلىق قاناتىن جايعاندا عانا جاسامپازدىققا قول جەتكىزە الامىز. وعان قالىپتاسقان العىشارتتار جەتكىلىكتى. «نۇر وتان» پارتياسى وسى سايلاۋالدى باعدارلاماسىندا اتالعان ۋاقىت ارالىعىندا ەلدىڭ دامۋىنا قوساتىن ءوزىنىڭ قاداۋ-قاداۋ ىستەرىن ايقىندادى. ءاربىر وڭىردەن كەلگەن دەلەگاتتار پارتيانىڭ كەزەكتەن تىس سەزىندە قوزعالعان وزەكتى ماسەلەلەردى شەشۋ جولدارىن جەرگىلىكتى جەردەگى حالىققا جان-جاقتى جەتكىزىپ, ونى ناسيحاتتاۋ ىسىنە بەلسەنە كىرىسەدى. قىسقاسى, بۇل پارتيامىزدىڭ سايلاۋالدى باعدارلاماسىندا كوزدەلگەن باعىتتاردى ورىنداۋعا پارتيا مۇشەلەرى جۇمىلا اتسالىسادى دەگەن ءسوز. جالپىۇلتتى جۇمىلدىرۋشى پارتياعا اينالعان «نۇر وتان» الداعى سايلاۋدا حالىقتىڭ سەنىمىنە يە بولاتىنى ءسوزسىز. ويتكەنى, جاھاندىق قاۋىپ-قاتەرگە قارسى پارتيا سايلاۋالدى باعدارلاماسىندا ءوزىنىڭ ناقتى ءىس-قيمىل جوسپارىن ۇسىنىپ وتىر. زاماناۋي ءتيىمدى مەملەكەتتىك اپپاراتتى قالىپتاستىرۋ, زاڭنىڭ ۇستەمدىك قۇرۋى, «نۇرلى جول» جاڭا ەكونوميكالىق ساياساتى – بۇلاردىڭ ءبارى دە سايلاۋشىلاردى «قازاقستاندىق ارمانعا باستايتىن جول». ەندەشە, بۇل جولعى سايلاۋدا دا «نۇر وتان» پارتياسىنىڭ ءباسى جوعارى بولادى دەپ ەسەپتەيمىن. ميحايل لابۋكوۆ, «يمستالكون» زاۋىتىنىڭ ديرەكتورى: – پارتيا قۇرىلتايىندا ءبىراز ماسەلە قامتىلدى. قازىرگى جاھاندىق دەڭگەيدە ورىن العان قيىندىقتاردى قالاي ەڭسەرۋگە بولاتىنى پارتيانىڭ الدىنا ۇلكەن مىندەت رەتىندە جۇكتەلدى. ارينە, سايلاۋدا تاڭداۋ قاي پارتياعا تۇسەتىنىن حالىقتىڭ ءوزى شەشەدى. ءبىز ءوز قاتارىمىزعا حالىق سەنىمىنە لايىقتى دەگەن كانديداتتارىمىزدى ۇسىندىق. ءبىز سايلاۋدان كەيىنگى كەزەڭدە ۇلكەن وزگەرىستەر بولادى دەگەن ۇمىتتەمىز. حالىقارالىق جاعداي شيەلەنىسكەن مىنا زاماندا بىردەڭە دەۋ قيىن. بىراق تا مۇناي مەن وزگە دە شيكىزاتتارعا دەگەن باعانىڭ قۇلدىراۋىنا قاراماستان, جاقسىلىقتار كۇتەمىز جانە ونى ءوز قولىمىزبەن جاساۋعا تىرىسامىز. قازاقستاندىقتاردىڭ كوپشىلىگى دە سونداي پىكىردە دەگەن سەنىمدەمىن. سايلاۋدى الدىن الا وتكىزۋ تۋرالى شەشىم قابىلداعان ەلباسى باعىتىمىزدىڭ دۇرىس ەكەنىن كورسەتىپ قانا قويماي, سونىمەن بىرگە, دەپۋتاتتار كورپۋسىن جاڭارتۋ ارقىلى رەفورمالاردى تەرەڭدەتە ءتۇسۋ بۇگىنگى كۇن تارتىبىندە تۇرعان ءبىرىنشى كەزەكتى ماسەلە ەكەنىن ۇعىندىرعانداي بولدى. تيمۋر كۋدراتيللاەۆ, «جاس وتان» جق مۇشەسى, ستۋدەنت: – «نۇر وتان» پارتياسىنىڭ كەزەكتەن تىس قۇرىلتايىنا ەلباسى, پارتيا توراعاسى نۇرسۇلتان ءابىش ۇلى نازارباەۆتىڭ ءسوزىن تىڭداۋ ءۇشىن ادەيى كەلگەن بولاتىنبىز. ويتكەنى, قازىر ەلىمىزدىڭ الدىندا ۇلكەن ىستەر كۇتىپ تۇر. ونىڭ ۇستىنە, مىنا الەمدى شارپىعان داعدارىستى ەڭسەرۋ ءۇشىن دە نەندەي ۇسىنىستار ايتىلادى ەكەن دەگەن ويمەن دە كەلدىك. بىزدەر, ستۋدەنتتەر قاۋىمى ءۇشىن بۇل وتە قىزىقتى دا قىزعىلىقتى. قازىر مەن ءوزىم «جاس وتان» جاستار قاناتىنىڭ قۇرامىندامىن. ونىڭ ۇستىنە, ۋنيۆەرسيتەت قابىرعاسىندا ورىن الىپ جاتقان كوپتەگەن ءىس-شارالارعا قاتىسىپ, ءوزىمىزدىڭ تۇلعا رەتىندە قالىپتاسۋىمىزعا كۇش سالۋدامىز. ساياساتقا تەرەڭ بويلاماساق تا, ەلباسىنىڭ جۇرگىزىپ كەلە جاتقان ساياساتىنىڭ دۇرىستىعىنا زارەدەي دە كۇمانىمىز جوق. ويتكەنى, كوپتەگەن كۇردەلى كەزەڭدەردەن سۇرىنبەي ءوتىپ كەلە جاتقانىمىزدىڭ سەبەبى دە وسى دەپ بىلەمىن.
