«نۇر وتاننىڭ» رەسپۋبليكالىق سايلاۋالدى شتابى اشىلدى

بۇل تۋرالى «نۇر وتان» پارتياسىنىڭ ورتالىق اپپاراتىندا وتكەن بريفينگ بارىسىندا پارتيا توراعاسىنىڭ ءبىرىنشى ورىنباسارى اسقار مىرزاحمەتوۆ مالىمدەدى. «نۇر وتان» پارتياسىنىڭ رەسپۋبليكالىق سايلاۋالدى شتابىنىڭ قۇرامىنا تانىمال پارتيا جانە قوعام قايراتكەرلەرى, پارتيانىڭ ساياسي كەڭەسىنىڭ مۇشەلەرى كىرگەنىن ايتتى. وتكەن سايلاۋ ناۋقاندارىنا قاتىسىپ, مول تاجىريبە جيناقتاعان ازاماتتارمەن قاتار, شتاب قۇرامىنا جاستار ۇيىمدارىنىڭ بەلسەندى وكىلدەرى دە كىرگەن. پارتيا توراعاسى نۇرسۇلتان نازارباەۆتىڭ تاپسىرماسىمەن «نۇر وتاننىڭ» سايلاۋالدى شتابىن اسقار مىرزاحمەتوۆ باسقاردى. پارتيا توراعاسىنىڭ ءبىرىنشى ورىنباسارى, سونداي-اق, پارتيانىڭ كەزەكتەن تىس ءXVىI سەزىندە پارلامەنت ءماجىلىسىنىڭ دەپۋتاتتارى سايلاۋىنا ارنالعان پارتيالىق ءتىزىم بەكىتىلىپ, جاڭا سايلاۋالدى باعدارلامانىڭ قابىلدانعانىن ەسكە سالدى. «شتاب جۇمىسىنىڭ مىندەتى – «نۇر وتان» پارتياسىنىڭ پارلامەنتتىك جانە ءماسليحاتتار سايلاۋلارىندا ايقىن جەڭىسىنە قول جەتكىزۋ», – دەدى ا.مىرزاحمەتوۆ. ونىڭ ايتۋىنشا, «نۇر وتان» پارتياسى بيلىكتەگى باسىمدىققا يە جانە جاۋاپكەرشىلىگى مول ساياسي كۇش رەتىندە ءوز سايلاۋالدى باعدارلاماسىندا جاڭا ۇدەرىستەرگە جاۋاپ بەرەتىن جانە بىرلىك, تۇراقتىلىق پەن جاسامپازدىقتى قامتاماسىز ەتۋگە باعىتتالعان ەلباسى انىقتاپ بەرگەن مەملەكەتتىك باعداردى جۇزەگە اسىرۋ جونىندەگى العا قويىلعان ماقساتتارعا قول جەتكىزۋ ءۇشىن ناقتى مەجەلەردى بەلگىلەدى. بۇگىنگى تاڭدا پارتيادا ءتۇرلى الەۋمەتتىك توپتارعا جاتاتىن تۇرعىندارمەن ناقتى ءىس-قيمىل جوسپارى ازىرلەنىپ, رەسپۋبليكالىق جەلىلىك كەستەسى قابىلدانىپ, مەديالىق جوسپار بەكىتىلدى. ەلىمىزدىڭ بارلىق وڭىرلەرىندە سەنىمدى وكىلدەر مەن پارتيا بەلسەندىلەرىنىڭ جۇمىسىن ۇيلەستىرەتىن ءدال وسىنداي سيپاتتاعى 16 ايماقتىق جانە 208 اۋماقتىق شتاب قۇرىلماق. ولاردىڭ قۇرامىنا 3,5 مىڭنان اسا ادام كىرەدى. بارلىق شتابتاردىڭ جۇمىسىنا 29 مىڭنان استام سەنىمدى وكىل, سونداي-اق, 27 مىڭنان استام پارتيا بەلسەندىلەرى قاتىساتىن بولادى.   ساۋلەبەك ءبىرجان.