قاپشاعايداعى اسكەري بولىمدە سەرجانت ءوز-وزىنە قول جۇمسادى

استانا. 1 اقپان. 31 قاڭتار كۇنى قاپشاعاي قالاسىنىڭ اەروۇتقىر اسكەرلەرىنە قاراستى 32363 اسكەري بولىمىندە 1992 جىلى تۋعان كىشى سەرجانت اسحات قازاقپاەۆ ءوز-وزىنە قول جۇمسادى. بۇل تۋرالى قورعانىس مينيسترلىگىنىڭ اقپارى بويىنشا egemen.kz ءتىلشىسى حابارلادى. ول پوستتا باسىنان جاراقات العان كۇيىندە تابىلدى. الدىن الا مالىمەت بويىنشا اسحات قازاقپاەۆتىڭ تەلەفون ارقىلى ەكى حابارلاما جىبەرگەنى انىقتالدى. ونىڭ ءبىرى – تۋىس قارىنداسىنىڭ كۇيەۋىنە جىبەرىلگەن. حابارلامادا: «تۋىستارىم, بارلىعى ءۇشىن مەنى كەشىرىڭىزدەر, ەشكىمدى كىنالاۋدىڭ قاجەتى جوق, مەن جوسپارلاپ, وسىلاي شەشۋگە بەل بۋدىم. مەنى كەشىرىڭىزدەر. اناما باس-كوز بولىڭىزدار. مەن بارلىقتارىڭدى قاتتى جاقسى كورەمىن», دەلىنگەن.  ەكىنشى حابارلامانى گۇلسارا يسمايلوۆا ەسىمدى قىزىنا جىبەرگەن. وندا سەرجانت: «وتىنەمىن كەشىر مەنى, مەن وسىلاي بولعانىن قالادىم», دەپ جازىپتى. قىزدىڭ ايتۋى بويىنشا كىشى سەرجانت قازاقپاەۆ اقشادان قينالىپ جۇرگەن اناسىنىڭ نەسيەسىن تولەپ كەلگەن. ودان باسقا تۋىس ءىنىسىنىڭ ايتۋىنشا, ول دەمالىس كەزىندە ەكى رەت اسىلۋ جانە كۇرە تامىرىن كەسۋ ارقىلى وزىنە-ءوزى قول جۇمساماق بولعان. بۇنىڭ بارىنە اناسى ەكەۋىنىڭ اراسىنداعى ۇرىس-كەرىس سەبەپ بولۋى مۇمكىن. اسكەري بولىمدە قايتىس بولعان سەرجانتقا جاقسى مىنەزدەمە بەرىپ وتىر. قارۋلاستارىنىڭ ايتۋىنشا, كىشى سەرجانت كومانديرلەرمەن جانە جەكە قۇراممەن ۇرىس-كەرىسكە بارماعان. قازىرگى ۋاقىتتا وسى ءىس بويىنشا تەرگەۋ جۇرگىزىلۋدە. داستان كەنجالين. دەرەك: قازاقستان رەسپۋبليكاسى قورعانىس مينيسترلىگى. سۋرەت: egemen.kz