نيگەرياداعى جارىلىستان قازا تاپقاندار سانى 86 ادامعا جەتتى

استانا. 1 اقپان. نيگەريانىڭ سولتۇستىك بولىگىندەگى مايدۋگۋري قالاسىنا تاياۋ ماڭداعى ەلدى مەكەندە بولعان جارىلىستان قازا تاپقاندار سانى 86 ادامعا جەتتى. سونداي-اق, 62 تۇرعىن ءتۇرلى جاراقات الدى. بۇل تۋرالى interfax.ru سايتىنا سىلتەمە جاساعان egemen.kz ءتىلشىسى حابارلادى. لاڭكەستىك ارەكەتكە بارعان تاعى دا «بوكو حارام» ۇيىمىنىڭ لاڭكەستەرى ەكەنى انىقتالدى. ولار ايماق تۇرعىندارىمەن قاتار جاقىن ماڭايداعى بوسقىندار لاگەرىنە دە شابۋىل جاساعان. كۋاگەرلەردىڭ ايتۋىنشا, سودىرلار توبى دالوري ەلدى مەكەنىنە ارنايى اسكەري كيىم كيگەن كۇيدە بىرنەشە موتوتسيكلمەن, جۇك كولىكتەرىمەن كەلگەن. كەلگەن بەتتەرىندە جارىلعىش زاتتاردى لاشىق ۇيلەرگە لاقتىرىپ, ارتىنشا بەي-بەرەكەت وق جاۋدىرعان. قاشىپ قۇتىلماق بولعانداردىڭ اراسىندا جانكەشتىلەر پايدا بولا كەتىپ, وزدەرىن جارىپ جىبەردى. ماڭايدا ساۋ باسپانا قالماعان. ءتارتىپ ساقشىلارى وقيعا ورنىنا كەلگەنىمەن لاڭكەستەرگە تويتارىس بەرە الماي, قوسىمشا جاساق توبىن كۇتتى. وسىدان سوڭ عانا لاڭكەستەر ۇيىمى شەگىنىس جاساعان. ايتا كەتەيىك, اتالعان ۇيىمنىڭ شابۋىلىنان سوڭعى 6 جىل ىشىندە 20 مىڭنان استام بەيبىت تۇرعىن قازا تاۋىپ, ونداعان مىڭى ءتۇرلى جاراقات العان. وسىعان بايلانىستى 2,5 ميلليون ادام باسپانالارىن تاستاپ كەتۋگە ءماجبۇر بولدى. اتالعان توپ كوبىنە نيگەريانىڭ سولتۇستىك-باتىسىندا, سونداي-اق, كامەرۋن مەن چاد ەلدەرىنە تەررورلىق شابۋىل جاسايدى. ايان ءابدۋالي. دەرەك: interfax.ru. سۋرەت: 112.ua.