قوستانايدا ەكى قاباتتى جاتاقحانا جانىپ كەتتى

قوستاناي. 1 اقپان. قوستاناي قالاسىنداعى احمەت بايتۇرسىنوۆ اتىنداعى ورتالىق كوشەدە ورنالاسقان ەكى قاباتتى جاتاقحانا كۇلگە اينالدى. ابىروي بولعاندا, قىزىل ءورتتىڭ قۇربانى بولعان ەشكىم جوق, تۇرعىندار تەز ارادا قاۋىپسىز جەرگە كوشىرىلدى. بۇل تۋرالى ng.kz سايتىنا سىلتەمە جاساعان egemen.kz ءتىشىسى حابارلادى. جاتاقحانادا جالعا تاپسىرىلعان 26 بولمە بولعان. ونىڭ ارقايسىسىندا ءبىر وتباسىدان تۇرعان, كىشكەنتاي بالالار كوپ. كۋاگەرلەردىڭ ايتۋىنا قاراعاندا, ءورت تۇستەن كەيىن ساعات 15:00-دە باستالعان. جاتاقحانا كوكبازارمەن ىرگەلەس ورنالاسقاندىقتان ونىڭ اينالاسىندا ادام دا, كولىك تە كوپ. ءورت ءسوندىرۋ ماشيناسى قاپتاعان كولىكتەن جاتاقحاناعا وتە الماي ءبىراز ۋاقىتتان ۇتىلعان. ەڭ باستىسى, جاتاقحاناداعى تۇرعىندار دۇنيە-مۇلكىن الماسا دا, وزدەرى دالاعا شىعىپ ۇلگەرگەن. ولاردىڭ كيىم-كەشەگى, زاتتارى, قۇجاتتارى تۇگەل جانىپ كەتتى. تۇرعىندار 25 گرادۋس ايازدا جەلەڭ جەيدەلەرىمەن دالادا قالدى. جاتاقحانا تۇرعىندارىنىڭ بارلىعى دا گاز باللونىن نەمەسە ەلەكتر پليتالارىن پايدالانعان ەكەن. ولار ءورت قاۋىپسىزدىگىنە جاتاقحانادا جاعداي بولماعانىن, ايتەۋىر ەرتەلى-كەش ءورت بولاتىنىن ايتتى. №1 ءورت ءسوندىرۋ بولىمشەسىنىڭ قىزمەتكەرى سامرات نۇركين: «ءورتتى ءسوندىرۋ وتە كۇردەلى, ويتكەنى, ءۇيدىڭ سالىنۋ قۇرىلىمىنىڭ ءوزى تۇسىنىكسىز. جاتاقحانادا گاز باللونى كوپ, مىنە, ەكى باللون جارىلدى», – دەدى. تۇرعىندار جاتاقحانا يەسىنە ايىنا 25 مىڭ تەڭگەدەن تولەپ تۇرعان. ءنازيرا جارىمبەتوۆا. دەرەك, سۋرەت: ng.kz.