ماڭعىستاۋدا جولاۋشىلار پويىزى مەن گاز تيەگەن كولىك سوقتىعىستى

اقتاۋ. 28 قاڭتار. ماڭعىستاۋ وبلىسىندا جولاۋشىلار پويىزى مەن گاز تيەگەن كولىك سوقتىعىستى. بۇل تۋرالى lada.kz سايتىنا سىلتەمە جاساعان egemen.kz ءتىلشىسى حابارلادى. وقيعا بۇگىن ماڭعىشلاق-بەينەۋ ۋچاسكەسىنىڭ №6 بەكەتى ماڭىنداعى وتكەلدە كۇندىزگى ساعات 15:50 شاماسىندا بولعان. اپاتقا ۇشىراعان پويىز سول كۇنى تاڭەرتەڭ ماڭعىشلاق ستانساسىنان اتتانعان «ماڭعىشلاق-الماتى» جولاۋشىلار پويىزى, ال گاز قۇيىلعان تسيستەرنالى كولىك «قاراقۇدىقمۇنايگاز» اق-نا تيەسىلى بولىپ شىقتى. «مەن جاقىن ماڭنان ءوتىپ بارا جاتىپ, اپاتتى ءوز كوزىممەن كوردىم. پويىز ءماشينيسى ۇزاق دابىل قاقتى, بىراق گاز تاسۋشى كولىك توقتامادى. ناتيجەسىندە ەكەۋى سوقتىعىسىپ, پويىز كولىكتى 40 مەتردەي جەرگە ىسىرىپ اكەلدى. ءورت بولعان جوق, بىراق وقيعا ورنىنا جاقىن بارۋ مۇمكىن بولمادى. سەبەبى, گازدىڭ ءيىسى قاتتى شىعىپ تۇردى», – دەيدى وقيعا كۋاگەرى. وقيعا ورنىنا «قاراقۇدىقمۇناي» جشس جانە «كەنەسارى» جشس قۇتقارۋشىلارى مەن ءورت سوندىرۋشىلەرى كەلىپ جەتكەن. اپات سالدارىنان 1963 جىلعى اۆتوكولىك جۇرگىزۋشىسى مەرت بولىپ, ءماشينيستىڭ كومەكشىسى جاراقات العان. سونداي-اق, لوكوموتيۆتىڭ ءبىر سەكتسياسىنىڭ الدىڭعى بولىگى جاپىرىلعان. وتكەل الدىندا تۇرعان اۆتوكولىكتىڭ كەنەت قوزعالا باستاعانىن كورىپ, ساعاتىنا 50 شاقىرىم جىلدامدىقپەن كەلە جاتقان پويىز ءماشينيسى شۇعىل تەجەگىشتى باسۋعا شەشىم قابىلداعانىمەن, اراقاشىقتىقتىڭ از بولۋىنا بايلانىستى سوقتىعىسۋدىڭ الدىن الۋ مۇمكىن بولماعاندىعىن ايتقان. قازىرگى تاڭدا وقيعا ورنىندا تەرگەۋ جۇمىستارى جۇرگىزىلۋدە. ەسكە سالا كەتەيىك, 2013 جىلى 16 قاراشادا اقتاۋ قالاسىنان قاشىق ەمەس جەردە تاۋار تيەگەن پويىز بەن جۇك كولىگىنىڭ سوقتىعىسۋى سالدارىنان تەپلوۆوز ءماشينيسىنىڭ كومەكشىسى قازا تاپقان بولاتىن. گۇلايىم شىنتەمىرقىزى. دەرەك, سۋرەت: lada.kz.