قوسشىدا قۇلاش جايعان كاسىپورىن

اقمولا وبلىسىنىڭ اكىمى س.كۋلاگين مەن قازاقستان ىسكەر ايەلدەرى اسسوتسياتسياسىنىڭ ءتورايىمى, قازاقستان رەسپۋب­ليكاسى پرەزيدەنتى جانىن­داعى ايەلدەر ىستەرى جانە دەمو­گرافيالىق ساياسات جونىندەگى ۇلتتىق كوميسسيانىڭ مۇشەسى ر.سارسەمباەۆانىڭ قاتىسۋىمەن تسەلينوگراد اۋدانىنداعى قوسشى اۋىلىندا «قازىنا-SP» جشس جيھاز تسەحىنىڭ سالتاناتتى اشىلۋ ءراسىمى بولدى. «قازىنا-SP» باس ديرەك­تورى سايرا ماتايباەۆا جۇرت­شىلىققا ارناعان سوزىندە «ءبىز بۇرىن دا 10 جىل بويى جيھاز شىعارىپ كەلدىك, – دەدى. الايدا, ءوندىرىستى كەڭەيتۋ نيەتىمىز ەندى جۇزەگە اسىپ وتىر. وڭىرلەردى دامىتۋ باعدارلاماسى شەڭبەرىندە تسە­لينوگراد اۋدانىنىڭ اكىم­دىگى جەر تەلىمىن ءبولىپ, ينۆەس­تيتسيالىق جوبامىزدى جۇزەگە اسىرۋدى باستادىق. جوبانىڭ جالپى قۇنى 378 ميلليون تەڭگەنى قۇرايدى. ونىڭ ىشىندە جابدىقتار ساتىپ الۋ ءۇشىن «ءوندىرىس» باعدارلاماسى اياسىندا 110 ميلليون تەڭگە قارجى ءبو­لىنىپ وتىر. وبلىس اكىمى سەرگەي ۆيتالەۆيچ تاراپىنان قولداۋ بىلدىرىلگەنىنە دە ريزامىز». بىزگە بەرىلگەن مالىمەتكە قاراعاندا, كاسىپورىن بۇگىنگى كۇنى ەكولوگيالىق تازا ماتە­ريال­داردان دايىندالعان كەڭ­سە, ءبىلىم جانە دەنساۋلىق ساق­تاۋ مەكەمەلەرىنە قاجەتتى جيھاز­داردى قازاقستان نارىعىنا شى­عا­رۋدا. ال, مۇندا جۇمىس ىستەيتىن 60 ادامنىڭ ايلىق جا­لا­قىسى 100 مىڭ تەڭگەدەن اسىپ تۇسۋدە. جاڭا تسەح جىلىنا 30 مىڭ دانا ساپالى ءونىم دايىنداي الادى. سالتانات سوڭىندا «قازىنا-SP» جشس قىزمەتكەرى قونىس­تاناتىن تۇرعىن ءۇي كەشەنىنىڭ تانىس­تىرىلىمى بولىپ, جينال­عان قاۋىم كاسىپورىن دايىن­دا­عان ونىمدەر كورمەسىن تاماشالادى. باقبەرگەن امالبەك, «ەگەمەن قازاقستان». اقمولا وبلىسى, تسەلينوگراد اۋدانى.