كامەرۋندا جويقىن جارىلىستان 29 ادام قازا تاپتى

استانا. 25 قاڭتار. كامەرۋننىڭ سولتۇستىگىندە بولعان جويقىن جارىلىستان 29 ادام قازا تاۋىپ, 30 تۇرعىن ءتۇرلى جاراقات الدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. «الدىن-الا بولجام بويىنشا, 29 ادام قازا تاپتى. ونىڭ ىشىندە ءوزىن-ءوزى جارىپ جىبەرگەن 3 جانكەشتىنىڭ دەنەسى انىقتالدى. سونداي-اق, زارداپ شەككەن 30 تۇرعىن جاقىن ماڭايداعى اۋرۋحانالارعا جەتكىزىلدى», – دەيدى جەرگىلىكتى پوليتسيا قىزمەتكەرى. ءتارتىپ ساقشىلارىنىڭ ايتۋىنشا, قاندى وقيعانىڭ ۇيىمداستىرۋشىلارى بۇل جولى دا «بوكو حارام» توبىنىڭ سودىرلارى بولۋى مۇمكىن دەگەن بولجامدارىن ايتتى. سەبەبى, اتالعان ۇيىم وسىعان دەيىن بىرنەشە رەت حالىق كوپ شوعىرلانعان جەرلەردە جارىلىس ۇيىمداستىرىپ, بەيبىت تۇرعىندارعا سان مارتە وق جاۋدىرعان. نەبارى التى جىلدىڭ ىشىندە لاڭكەستىك توپتىڭ قولىنان 20 مىڭعا جۋىق ادام قازا تاۋىپ, كوپتەگەن تۇرعىن ءتۇرلى جاراقات العان. «بوكو حارام» سودىرلار ۇيىمى كوبىنە نيگەريانىڭ سولتۇستىك-باتىسىندا, كامەرۋن جانە چاد ەلدەرىندە تەررورلىق شابۋىل جاسايدى. ايان ءابدۋالي. دەرەك: تاسس. سۋرەت: zn.ua.