«سكولكوۆو» يننوۆاتسيا ورتالىعى سىر وڭىرىنە 50 جوبا اكەلەدى

قىزىلوردا. 25 قاڭتار. ماسكەۋدەگى «سكولكوۆو» يننوۆاتسيالىق ورتالىعى تەلەكوممۋنيكاتسيا, عارىش جانە يادرولىق تەحنولوگيا, بيومەديتسينا سىندى زامان تالابىنا ساي 50 جوبانى قازاقستان نارىعىنا اكەلۋگە دايىن. بۇل تۋرالى egemen.kz ءتىلشىسى حابارلادى. 22-23 قاڭتار كۇنى ماسكەۋ قالاسىنا جۇمىس ساپارمەن بارعان قىزىلوردا وبلىسىنىڭ اكىمى قىرىمبەك كوشەرباەۆ پەن «سكولكوۆو» يننوۆاتسيا ورتالىعى باسشىلىعىنىڭ كەزدەسۋ بارىسىندا ايتىلدى. كەلىسىم كەزىندە بىلىكتى ماماندار دايارلاۋ اياسىن كەڭەيتۋ دە ءسوز بولدى. كەزدەسۋ بارىسىندا قوس تاراپ «بايقوڭىر» كەشەنىندە تەلەكوممۋنيكاتسيا جانە عارىش سالاسىن دامىتۋ بويىنشا بىرلەسىپ جۇمىس ىستەۋ ماسەلەسىن تالقىلادى. ناقتىلاپ ايتقاندا, ءسوز كىشى سپۋتنيكتەردى ۇشىرۋ تۋرالى بولدى. «سكولكوۆو» وربيتالىق ۇشىرۋ ورتالىعى مەن ماسكەۋ اۆياتسيالىق ينستيتۋتىنىڭ العاشقى سپۋتنيگى 2016 جىلدىڭ قازان ايىندا «بايقوڭىر» عارىش ايلاعىنان ۇشىرىلادى دەپ جوسپارلانۋدا. ماسكەۋلىكتەر قىزىلوردا وبلىسىنان بارعان ارىپتەستەرىنە سكولكوۆسك عىلىم جانە تەحنولوگيالار ينستيتۋتىندا جۇزەگە اسىرىلىپ جاتقان  ينجەنەرلىك ءبىلىم بەرۋدىڭ جاڭا مودەلىن تانىستىردى. وبلىس اكىمى سكولكوۆسك ينستيتۋتىنىڭ ماگيسترلىك باعدارلاماسىنا قىزىعۋشىلىق تانىتتى. سوڭعى ەكى جىلدا قىزىلوردا وبلىسىنىڭ 320 جاس ورەنى ماسكەۋ مەن سانكت-پەتەربۋرگتىڭ ينجەنەرلىك-تەحنيكالىق ءبىلىم بەرەتىن وشاقتارىندا ءبىلىم الىپ جاتقاندىعىن ەسكەرسەك, ەكى جاقتىق كەلىسىمنىڭ پايداسى زور. مۇنان بولەك وبلىس اكىمى كاسىپكەرلىك ورتانى دامىتۋ جونىندەگى ەكونوميكالىق جانە الەۋمەتتىك سالاداعى شارالار كەشەنىن جۇزەگە اسىرۋ ماقساتىندا رف ۇكىمەتى قۇرعان «ستراتەگيالىق باستامالار اگەنتتىگى» جانە «رەسەيلىك ۆەنچۋرلىك كومپانيا» باسشىلارىمەن كەزدەسۋ وتكىزدى. وندا ۇلتتىق تەحنولوگيالىق باستاماسى اياسىندا قارجى جانە كادرلىق دامۋ بويىنشا نەگىزگى تەحنولوگيالار مەن قاجەتتى شارالاردى انىقتاۋ جانە داعدارىستىق داعدىلار يەلەرىن قاتىستىرۋ مەحانيزمدەرىن ەنگىزۋ بويىنشا جۇيەلىك شەشىمدەر قابىلدانادى. «WorldSkillsRussia» قورىنىڭ باس ديرەكتورى ر.ن.ۋرازوۆپەن كەزدەسۋ بارىسىندا ەلىمىز تەگىن كاسىبي ءبىلىم بەرۋ جۇيەسىنە كوشۋگە بايلانىستى كادرلاردى دايىنداۋ جانە كاسىبي-تەحنيكالىق ءبىلىم جۇيەسىن دامىتۋ بويىنشا سەرىكتەستىك مۇمكىندىكتەرى تالقىلاندى. ەرجان بايتىلەس. دەرەك, سۋرەت: egemen.kz