قىزىلوردا. 25 قاڭتار. وبلىس ورتالىعىندا 23 قاڭتار كۇنى ساعات 17.30 شاماسىندا سۇلتان بەيبارىس كوشەسىنەن ءوتىپ بارا جاتقان جول-ءپاترۋلدى پوليتسيا باتالونىنا «كوپىر ۇستىنەن بەلگىسىز ءبىر ازاماتتىڭ سەكىرىپ كەتكەندىگى» جونىندە حابارلاما كەلىپ تۇسەدى. بۇل تۋرالى egemen.kz حابارلادى.
اتالعان حابارلاما بويىنشا پوليتسيا اعا لەيتەنانتى شاتتىق جايساڭباەۆ, پوليتسيا اعا سەرجانتى باقىتجان اشىربەكوۆ پەن نۇرلىبەك نۇرتاەۆ «سىرداريا» كوپىرىنە دەرەۋ جەتىپ, وزەننىڭ اعىسىمەن باتىسقا قاراي اعىپ بارا جاتقان ازاماتتى بايقايدى. اۋا رايىنىڭ قولايسىزدىعىنا قاراماستان, سىرتقى كيىمدەرىمەن سۋعا ءتۇسىپ, ازاماتتى قۇتقارىپ الادى, العاشقى دارىگەرلىك كومەك كورسەتەدى. وقيعا باسىنا جەدەل جاردەم قىزمەتى شاقىرىلىپ, ازامات قىزىلوردا قالالىق اۋرۋحاناسىنا جەتكىزىلدى.
ازاماتتىڭ حال-جاعدايى جاقسى دەپ باعالانۋدا, ومىرىنە ەشقانداي قاۋىپ ءتونىپ تۇرعان جوق. قازىرگى تاڭدا ازاماتتىڭ بۇل قادامعا بارۋ سەبەپتەرىن جان-جاقتى زەردەلەۋ ماقساتىندا ءتيىستى جۇمىستار جۇرگىزىلۋدە.
ەرجان بايتىلەس.
دەرەك, سۋرەت: egemen.kz
