استانا. 25 قاڭتار. استانا قالاسى ورتالىق ساياباعىندا اسكەري قىزمەتشىلەر اراسىندا شاڭعىمەن جۇگىرۋدەن جارىس ءوتتى. بۇل تۋرالى egemen.kz ءتىلشىسى حابارلادى.
وعان قورعانىس مينيسترلىگىنىڭ ورتالىق اپپاراتى, قارۋلى كۇشتەردىڭ باس شتابى, باس باسقارمالارى, ورتالىقتارى, اقمولا وڭىرلىك گارنيزونىنىڭ اسكەري بولىمدەرى مەن مەكەمەلەرىنىڭ 300-گە جۋىق اسكەري قىزمەتشىسى قاتىستى.
«شاڭعى دايارلىعى جاۋىنگەرلىك دايارلىق باعدارلاماسىنا كىرەدى. ءبىز شاڭعىدا جۇگىرەمىز, وق اتامىز. شاڭعى دايىندىعى اسكەري قىزمەتشىلەردىڭ جاۋىنگەرلىك دايارلىعىنىڭ اجىراماس بولىگى بولىپ قالۋى ءتيىس. بارلىقتارىڭىزعا سايىستا ساتتىلىك, جەڭىس تىلەيمىن», دەدى قورعانىس ءمينيسترىنىڭ ءبىرىنشى ورىنباسارى – قارۋلى كۇشتەردىڭ باس شتابىنىڭ باستىعى گەنەرال-پولكوۆنيك ساكەن جاسۇزاقوۆ.
سپورت كوميتەتىنىڭ توراعاسى – ارميا ورتالىق سپورت كلۋبىنىڭ باستىعى ايتالاپ قورعامباەۆتىڭ ايتۋىنشا, جاۋىنگەردىڭ تولىق جاراقتاندىرىلۋىمەن مۇنداي شاڭعى جارىسى قازاقستاندا العاش رەت وتكىزىلىپ وتىر.
بىرنەشە ساعات بۇرىن سايىسقا قاتىسۋشىلار ءۇش رەت جۇگىرىپ ءوتتى. ونىڭ ارقايسىسىندا ءۇش كوشباسشى ايقىندالدى. العاشقى جۇگىرۋدە ءبىرىنشى ورىندى استانا قالاسىنىڭ قورعانىس ىستەرى جونىندەگى دەپارتامەنتىنىڭ كومانداسى, ەكىنشى جۇگىرۋدە ءبىرىنشى ورىندى قارۋلى كۇشتەردىڭ اسكەري پوليتسياسى باس باسقارماسى, ءۇشىنشى جۇگىرۋدە 68665 اسكەري ءبولىمىنىڭ اسكەري قىزمەتشىلەرى التىن مەدالدى جەڭىپ الدى. جالپى كوماندالىق ەسەپتە ءتۋرنيردىڭ باس جۇلدەسىن 68665 اسكەري ءبولىمىنىڭ كومانداسى يەلەندى. «گارنيزون اراسىندا ءبىز ءبىرىنشى ورىندى يەلەندىك, وتە قۋانىشتىمىز. كوماندامىز مىقتى ءارى تاتۋ. ءبىز بۇل جارىسقا دايىندالدىق, جەڭىسكە ابدەن لايىقتىمىز», دەپ اتاپ ءوتتى جەڭىس تۇعىرىنان كورىنگەن كوماندانىڭ اسكەري قىزمەتشىسى سەرجانت ج.قاليبەكوۆا.
ارميالىق شاڭعىدا جۇگىرۋ قارۋلى كۇشتەر وفيتسەرلەرىنىڭ, كەلىسىمشارت بويىنشا اسكەري قىزمەتشىلەرىنىڭ, ايەل اسكەري قىزمەتشىلەردىڭ دەنە دايارلىعىنىڭ دەڭگەيىن ارتتىرۋ, ولاردىڭ سپورتتىق شەبەرلىكتەرى مەن اسكەري-كاسىبي دايىندىعىنىڭ دەڭگەيىن كوتەرۋ ماقساتىندا وتكىزىلدى.
قازاقستاندىق ارميادا دەنە دايارلىعى جاۋىنگەرلىك دايارلىقتىڭ نەگىزى بولىپ تابىلادى. قارۋلى كۇشتەردىڭ وفيتسەرلەرى مەن كەلىسىمشارت بويىنشا اسكەري قىزمەتشىلەرى ۇدايى نەگىزدە پرەزيدەنتتىك تەست, اي سايىن دەنە دايارلىعى بويىنشا نورماتيۆتەر تاپسىرادى. ال جىلدىڭ سوڭىندا قورىتىندى تەكسەرىستە وزدەرىنىڭ كورسەتكىشتەرىن راستايدى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
