اقمولالىق جاس سپورتشى اۆستريادا كۇمىس مەدال جەڭىپ الدى

كوكشەتاۋ. 25 قاڭتار. اقمولا وبلىسىنىڭ جاس سپورتشىسى الىشەر قينۋاربەك اۆستريادا وتكەن VII حالىقارالىق بالالار قىسقى ويىندارىندا شاڭعى جارىسىنان ەكى بىردەي كۇمىس مەدال جەڭىپ الدى. بۇل تۋرالى «اقمولا مەديا ورتالىعى» دەرەگىنە سىلتەمە جاساعان egemen.kz ءتىلشىسى حابارلادى. جارىس اۆستريانىڭ ينسبرۋك قالاسىندا جالاۋ كوتەردى. ونداعى «Olympia World» سپورت ارەناسىنىڭ اياسىندا سپورتتىڭ 8 تۇرىنەن 31 مەادلدار جيىنتىعى ساراپقا سالىندى. بۇلاردىڭ اراسىندا تاۋ شاڭعىسى, بياتلون, شاڭعى جارىسى, مانەرلەپ سىرعاناۋ, كونكي سپورتى, حوككەي, فريستايل جانە سنوۋبورد بولدى. وسىناۋ وزگەشە فەستيۆالگە الەمنىڭ 22 ەلىنەن جاستارى 12-15 ارالىعىنداعى 800-گە جۋىق تالاپكەر قاتىستى. اقمولا وبلىسى, جارقايىڭ اۋدانىنداعى تاسوتكەل نەگىزگى مەكتەبىنىڭ 8-سىنىپ وقۋشىسى الىشەر قينۋاربەك وزىنە ارتىلعان ءۇمىتتى تولىعىمەن اقتادى. ول جەكە جارىستا مارە سىزىعىن ەكىنشى بولىپ كەسسە, ەستافەتادا دا ارىپتەستەرىمەن بىرگە سول دەڭگەيدەن كورىندى. ال 5 شاقىرىمعا كلاسسيكالىق ادىسپەن جۇگىرۋدە بەسىنشى بولدى. ونى بۇل جارىستارعا جەكە جاتتىقتىرۋشىسى فاريد باشماكوۆ دايىندادى. جارقايىڭ اۋدانى اكىمدىگىنىڭ ءباسپاسوز حاتشىسى گۇلجان بايەگىزوۆانىڭ ايتۋىنشا, بۇل اۋداننان ەلىمىزدىڭ نامىسىن 6 سپورتشى قورعاعان. ەسكە سالا كەتەيىك, حالىقارالىق بالالار ويىندارىنىڭ نەگىزى 1968 جىلى قالانعان. باقبەرگەن امالبەك. دەرەك, فوتو: اقمولا مەديا ورتالىعى.