شىعىس قازاقستاننىڭ كازناكوۆكا وتكەلىندەگى پارومنان اقاۋ شىقتى

وسكەمەن. 25 قاڭتار. شىعىس قازاقستان وبلىسى اكىمدىگى كازناكوۆكا وتكەلىندە جولاۋشى مەن جۇك تاسىمالدايتىن كەمەنىڭ بۇزىلىپ قالۋىنا بايلانىستى قاتىناستىڭ قانشا كۇندە قالپىنا كەلتىرىلەتىنىن مالىمدەدى. بۇل تۋرالى egemen.kz ءتىلشىسى حابارلادى. مۇز دەڭگەيى ءالى قاجەتتى قالىڭدىققا دەيىن قاتا قويماعاندىقتان, كازناكوۆكا وتكەلىندەگى مۇز ۇستىمەن جۇرەتىن جول ۋاقىتشا جابىق. شتاتتان تىس جاعدايلارعا جول بەرمەۋ ءۇشىن جاعالاۋعا تاۋلىك بويى كەزەكشىلىك قويىلىپ, جاعداي باقىلاۋعا الىندى. سەنبى كۇنى جاعالاۋدان 700 مەتر قاشىقتىقتا ىستەن شىققان پارومدا 17 كولىك پەن 40 ادام بولعان ەدى. توتەنشە جاعدايلار دەپارتمەنتىنىڭ حابارلاۋىنشا, قۇتقارۋشىلار وقيعا ورنىنا ءبىر ساعاتتان سوڭ جەتىپ, 28 ادامدى جاعالاۋعا جەتكىزدى. قالعان 12 ادام قۇتقارۋ قىزمەتىنەن باس تارتتى. پاروم سول كۇنى جاعالاۋعا اۋپىرىمدەپ ءوز كۇشىمەن جەتكەن. وبلىستىق جولاۋشىلار كولىگى جانە اۆتوكولىك جولدارى باسقارماسىنىڭ حابارلاۋىنشا, جىل سايىن بۇقتىرماداعى مۇزدىڭ قالىڭدىعى 15 سانتيمەترگە جەتكەن كەزدە مۇز ۇستىندەگى جول اشىلادى. بۇگىندە مۇزدىڭ قالىڭدىعى 5 سانتيمەترگە تەڭ. سوندىقتان, 10 كۇنگە جۋىق جول جابىق بولماق. وسىعان بايلانىستى پاروم جولاۋشى تاسىمالداۋعا قايتا جىبەرىلدى. ويتكەنى, مۇز بەلدەۋىن جارىپ, قوزعالۋعا قابىلەتتى بىردەن-ءبىر مامانداندىرىلعان سۋ كولىگى وسى وڭىردە ازىرگە جالعىز. «پارومنىڭ ءبىر قوزعالتقىشى جۇمىس ىستەمەي قالعاندىقتان, ءجۇرىسىن توقتاتقان بولاتىن. قازىرگى كەزدە جاعداي تولىق باقىلاۋعا الىندى. تەحنيكالىق اقاۋ جۇمىس تارتىبىنە ساي جوندەلدى. پارومنىڭ ءتۇبى زاقىمدانعان جوق», – دەدى جولاۋشىلار كولىگى جانە اۆتوكولىك جولدارى باسقارماسى باسشىسىنىڭ ورىنباسارى اسەت سۇلتانوۆ. دۋمان اناش. دەرەك: egemen.kz. سۋرەت: شىعىس قازاقستان وبلىسىنىڭ توتەنشە جاعدايلار دەپارتامەنتى.