قازاقستاندا شوشقا تۇماۋىن جۇقتىرعاندار سانى ازايماي وتىر

استانا. 25 قاڭتار. قازىرگى تاڭدا قازاقستان اۋماعىندا شوشقا تۇماۋىنىڭ تارالۋى مامانداردى الاڭداتىپ وتىر. بۇگىنگە دەيىن ەلىمىزدىڭ ءار وڭىرىندە H1N1 ۆيرۋسىن جۇقتىرعان 270 ناۋقاس تىركەلگەن. بۇل تۋرالى today.kz سايتىنا سىلتەمە جاساعان egemen.kz ءتىلشىسى حابارلادى. ۇلتتىق ەكونوميكا مينيسترلىگى تۇتىنۋشىلاردىڭ قۇقىعىن قورعاۋ جونىندەگى كوميتەت توراعاسىنىڭ ورىنباسارى – قازاقستاننىڭ باس مەملەكەتتىك سانيتار دارىگەرى جانداربەك بەكشيننىڭ ايتۋىنشا, ەڭ كوپ جاعداي اتىراۋ وبلىسىندا تىركەلگەن. مۇنايلى ولكەدە 41 ادامنىڭ اتالعان ىندەتتى جۇقتىرعانى انىقتالىپ وتىر. سونداي-اق, قىزىلوردا جانە ماڭعىستاۋ وبلىستارىندا – 38, استانا قالاسىندا 31 ناۋقاس شوشقا تۇماۋىنا شالدىققان. ودان بولەك, سوڭعى اپتادا وڭتۇستىك قازاقستان جانە اقتوبە وبلىستارىندا دا جاعدايدىڭ ۋشىعىپ تۇرعانى بەلگىلى بولدى. اتاپ ايتقاندا, وڭتۇستىك قازاقستاندا – 37, ال اقتوبە وڭىرىندە 28 ناۋقاس تىركەلگەن. وسى رەتتە ەلىمىز بويىنشا وسى دەرتتەن 1 ادامنىڭ قايتىس بولعانىن اتاپ وتكەن ءجون. جانداربەك بەكشين اۋرۋدىڭ بەلگىلەرى بايقالعان كەزدە بىردەن دارىگەرلەرگە كورىنۋگە كەڭەس بەردى. «بىزدە كوبىنە ادامدار وزدەرىن وزدەرى ەمدەيدى. ول دۇرىس ەمەس. كەيىن جاعداي اسقىنعان كەزدە ءبارى كەش بولۋى مۇمكىن. سوندىقتان, اتالعان تۇماۋدىڭ بەلگىلەرى بايقالسا, بىردەن ماماندارعا كورىنۋ كەرەك», – دەگەن ول اۋرۋدىڭ باستاپقى بەلگىلەرىن ايتىپ بەردى. ونىڭ سوزىنە قاراعاندا, ەگەر ادەتتەگى تۇماۋ بولسا, 5-7 تاۋلىكتەن كەيىن اسقىنۋى مۇمكىن. ال شوشقا تۇماۋىندا ادام ەكىنشى, ءۇشىنشى تاۋلىكتە سىر بەرەدى. نەگىزگى سيمپتومدارى – دەنە قىزۋىنىڭ كۇرت كوتەرىلۋى, ءتىپتى 39 گرادۋستان جوعارى بولادى. سونداي-اق, بۇلشىق ەتتەر قۇرىسىپ, بۋىندار سىرقىرايدى. ەلامان قوڭىر. دەرەك: today.kz. سۋرەت: potoksmivip.ru.