پارلامەنت سايلاۋىنىڭ ۇگىت-ناسيحات جۇمىستارى 20 اقپاندا باستالادى

استانا. 25 قاڭتار. بۇگىن استانا قالاسىندا 2016 جىلعى 20 ناۋرىزعا تاعايىندالعان پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىن سايلاۋدى ازىرلەۋ مەن وتكىزۋدى ۇيىمداستىرۋ ماسەلەلەرى جونىندە رەسپۋبليكالىق سەمينار-كەڭەس ءوتتى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. سەمينار-كەڭەستىڭ جۇمىسىنا قاتىسۋعا وبلىستىق, استانا جانە الماتى قالالىق سايلاۋ كوميسسيالارىنىڭ توراعالارى مەن حاتشىلارى, ساياسي پارتيالاردىڭ, مۇددەلى مەملەكەتتىك ورگانداردىڭ وكىلدەرى, سونداي-اق, سايلاۋ سالاسىندا قىزمەت ەتەتىن حالىقارالىق ۇيىمداردىڭ وكىلدەرى شاقىرىلدى. ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ قاتىسۋشىلاردى كوميسسيانىڭ اتقارعان دايىندىق جۇمىستارى, قىزمەتى جانە سايلاۋ ناۋقانىنىڭ بارىسى تۋرالى قىسقاشا اقپاراتتاندىردى. سونداي-اق, توراعا ۇمىتكەرلەر مەن ساياسي پارتيالارعا سايلاۋ الدىنداعى ۇگىت-ناسيحات جۇمىستارىن جۇرگىزۋگە تەڭدەي مۇمكىندىك جاساۋ قاجەتتىگىن اتاپ ءوتتى. «باق ارقىلى ۇگىت-ناسيحات جۇمىستارى تىركەۋ مەرزىمى اياقتالعاننان كەيىن باستالادى. اتاپ ايتقاندا, ساياسي پارتيالار ءۇشىن ۇگىت-ناسيحات جۇمىستارى 20 اقپاندا, قازاقستان حالقى اسسامبلەياسى اتىنان ءماجىلىس دەپۋتاتتىعىنا ۇمىتكەرلەر ءۇشىن 6 ناۋرىزدا, ال ءماسليحات دەپۋتاتتىعىنا كانديداتتارعا 24 اقپاندا باستالادى. ۇگىت-ناسيحات جۇمىستارى باستالعانعا دەيىن ساياسي پارتيالاردىڭ ماقساتتارى مەن مىندەتتەرىن ناسيحاتتايتىن جارنامالىق ماتەريالداردىڭ بارلىعىنا دا پارتيانىڭ سايلاۋ قورىنان قارجى تولەنۋى ءتيىس. ودان بولەك, سايلاۋ الدى ۇگىت-ناسيحاتتى قامتيتىن بارلىق ماتەريالداردا قارجىلاندىرۋ كوزدەرى تۋرالى اقپارات بولۋى قاجەت», – دەدى قۋاندىق تۇرعانقۇلوۆ. ەلامان قوڭىر. دەرەك: inform.kz. سۋرەت: election.kz.