سولتۇستىك قازاقستاندا دەپارتامەنت باسشىسى تاعايىندالدى

پەتروپاۆل. 25 قاڭتار. مەملەكەتتىك قىزمەت ىستەرى مينيسترلىگى جاۋاپتى حاتشىسىنىڭ بۇيرىعىمەن مەملەكەتتىك قىزمەت ىستەرى مينيسترلىگىنىڭ سولتۇستىك قازاقستان وبلىسى بويىنشا دەپارتامەنتى باسشىسى – ادەپ جونىندەگى كەڭەسىنىڭ توراعاسى لاۋازىمىنا تۇرسىنباەۆ عالىم سۇلتان ۇلى تاعايىندالدى. بۇل تۋرالى egemen.kz ءتىلشىسى حابارلادى. عالىم سۇلتان ۇلى 1970 جىلى وڭتۇستىك قازاقستان وبلىسىندا تۋعان. قازاق حيميا-تەحنولوگيا ينستيتۋتىن «ينجەنەر-قۇرىلىسشى - تەحنولوگ» ماماندىعى بويىنشا, پرەزيدەنت جانىنداعى مەملەكەتتىك باسقارۋدىڭ ۇلتتىق جوعارعى مەكتەبىن «مەملەكەتتىك باسقارۋ» ماماندىعى بويىنشا, شىعىس قازاقستان مەملەكەتتىك ۋنيۆەرسيتەتىن «زاڭگەر» ماماندىعى بويىنشا بىتىرگەن. ەڭبەك جولىن 1986 جىلى جىلۋ كومبيناتىنىڭ جۇمىسشىسى رەتىندە باستاعان. 1993-1994 جىلدارى شىمكەنت قالاسى ءال-فارابي اۋداندىق اكىمشىلىگىنىڭ جاستار ءىسى, تۋريزم جانە سپورت باسقارماسىنىڭ مامانى, باس مامانى قىزمەتىن اتقارعان. 1998 جىلى ستراتەگيالىق جوسپارلاۋ جانە رەفورمالار اگەنتتىگىنىڭ مەملەكەتتىك قىزمەتتى رەفورمالاۋ باسقارماسىنىڭ باس مامانى. 2000 جىلدان باستاپ ءتۇرلى لاۋازىمداردا باسشىلىق ەتكەن. مەملەكەتتىك قىزمەت ىستەرى جونىندەگى اگەنتتىگىنىڭ وڭتۇستىك قازاقستان وبلىسى بويىنشا باسقارماسى باستىعىنىڭ ورىنباسارى, مەملەكەتتىك قىزمەت ىستەرى جونىندەگى اگەنتتىگىنىڭ قىزىلوردا وبلىسى بويىنشا باسقارماسىنىڭ باستىعى – وبلىستىق تارتىپتىك كەڭەس توراعاسى, قازاقستان رەسپۋبليكاسى مەملەكەتتىك قىزمەت ىستەرى جونىندەگى اگەنتتىگىنىڭ شىعىس قازاقستان وبلىسى بويىنشا باسقارماسىنىڭ باستىعى – وبلىستىق تارتىپتىك كەڭەس توراعاسى, شىعىس قازاقستان وبلىسى اكىمى اپپاراتىنىڭ باسشىسى, «نۇر وتان» پارتياسىنىڭ شىعىس قازاقستانداعى فيليال توراعاسىنىڭ ءبىرىنشى ورىنباسارى. 2011 جىلدىڭ تامىزىنان 2014 جىلدىڭ قاراشاسىنا دەيىن مەملەكەتتىك قىزمەت ىستەرى جونىندەگى اگەنتتىگىنىڭ قىزىلوردا وبلىسى بويىنشا باسقارماسىنىڭ (2013 جىلدان باستاپ دەپارتامەنت) باستىعى - تارتىپتىك كەڭەس توراعاسى. سونداي-اق, عالىم تۇرسىنباەۆ بۇعان دەيىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى باسشىسىنىڭ ورىنباسارى – تارتىپتىك كەڭەس توراعاسى قىزمەتىن اتقارعان. ءومىر ەسقالي. دەرەك, سۋرەت: egemen.kz.