وسكەمەن. 25 قاڭتار. شىعىس قازاقستان وبلىسىنىڭ الەۋمەتتىك جەلى قولدانۋشىلارى «قايىرىمدىلىق نانى» اتتى ىزگى شارانى قولعا الدى. بۇل تۋرالى egemen.kz ءتىلشىسى حابارلادى.
وڭىردەگى بەلسەندى الەۋمەتتىك جەلى قولدانۋشىلارىنىڭ ءبىرى رينات حاليكوۆ ءوز پاراقشاسىنا: «قايىرىمدىلىق نانى» – دوستارىمنىڭ باستاماسىمەن جانە قولداۋىمەن باستالعان الەۋمەتتىك اكتسيا. ءتىپتى, اكتسيا بولماعان كۇننىڭ وزىندە ءبىزدىڭ كۇندەلىكتى ءومىرىمىزدىڭ ءبىر بولشەگى. ءوزىمىز ازىق-ت ۇلىك الىپ جۇرگەن دۇكەننەن ءبىر بولكە ناندى ساتىپ الىپ, ساتۋشىعا قالدىرامىز. ولار ونى قارتتار مەن الەۋمەتتىك جاعىنان از قامتىلعان ادامدارعا بەرەدى. ءبىز ءۇشىن بۇل ۇساق-تۇيەك كورىنۋى مۇمكىن, ال بىرەۋلەردىڭ ءومىرى ءۇشىن وتە ماڭىزدى. مۇنى ءوزىمىزدى تىم قيناماي, جانىمىزدىڭ قالاۋىمەن جۇزەگە اسىرساق جەتكىلىكتى. ايىنا ءبىر-ەكى نان, قالاساڭىز ودان دا كوپ قالدىرساڭىز بولادى. بىراق اسىرا سىلتەۋدىڭ قاجەتى جوق. بۇل ءسىزدىڭ ىشكى الەمىڭىزدىڭ ءبىر بولىگى بولسىن! ال ءسىزدىڭ ارەكەتىڭىز وزىڭىزگە جانە بالا-شاعاڭىزعا جاقسىلىق بولىپ قايتا ورالسىن!», – دەپ جازدى.
الەۋمەتتىك شاراعا ءۇن قوسىپ جاتقان وسكەمەندىكتەر بارشىلىق. ولاردىڭ قاتارى ءسات سايىن تولىعىپ كەلەدى. اكتسياعا قاتىسۋشى جەلى قولدانۋشىلارىنىڭ بارلىعى دۇكەندەردە ساتۋشىمەن, قايىرىمدىلىققا قالدىرعان نانمەن بىرگە تۇسكەن سۋرەتتەرىن الەۋمەتتىك جەلىگە ورنالاستىرىپ, اتالعان شاراعا ءۇن قوسۋعا شاقىرۋدا.
دۋمان اناش.
دەرەك, سۋرەت: facebook.com.
