اتىراۋ كاسىپكەرى ەكى وتباسىن قامقورلىعىنا الدى

اتىراۋ. 25 قاڭتار. اتىراۋ وبلىسىندا شارۋا قوجالىعى جانە ازىق-ت ۇلىك دۇكەنى بار كاسىپكەر مۇرات سارمانوۆ تۇرمىسى تومەن ەكى وتباسىن جىل اياعىنا دەيىن نان, ءسۇت, ماي جانە ەتپەن تەگىن قامتۋدى ۇيعاردى. ول وبلىس كاسىپكەرلەرىن وسىنداي قايىرىمدىلىق ءىس جاساۋعا شاقىردى. بۇل تۋرالى egemen.kz ءتىلشىسى حابارلادى. قىزىلقوعا اۋدانىنداعى شارۋا قوجالىعىندا مال شارۋاشىلىعىن وركەندەتۋ ءىسىن قولعان مۇرات سارمانوۆ بۇل ويىن اتىراۋ قالاسىنا قاراستى گەولوگ كەنتتىك وكرۋگىنىڭ اكىمى نۇرجان جۇماحانوۆتىڭ حالىق الدىنداعى ەسەپ بەرۋ جيىنىندا ءمالىم ەتتى. بۇل جيىنعا وبلىس اكىمى باقتىقوجا ىزمۇحامبەتوۆ پەن اتىراۋ قالاسىنىڭ اكىمى نۇرلىبەك وجاەۆ قاتىسقان بولاتىن. كەنتتىڭ وزگە تۇرعىندارى جول, كوشە جارىعى سەكىلدى كوپتى تولعاندىرعان ماسەلەلەردى كوتەردى. وزىنە ءسوز كەزەگى تيگەن كاسىپكەر جەرگىلىكتى باسشىلاردان تۇرمىسى تومەن ەكى وتباسىنىڭ اتى-ءجونىن, مەكەنجايىن بەرۋدى سۇرادى. ول ەكى وتباسىن جىل اياعىنا دەيىن ءبىرىنشى كەزەكتە تۇتىناتىن نان, ءسۇت, ماي جانە ەت سەكىلدى ازىق-ت ۇلىكپەن قامتۋعا بەكىنىپ وتىر. «ينتەرنەتتەن ادامداردىڭ قوقىس اقتارىپ جۇرگەن فوتوسىن كوردىم. استىنا «داعدارىس باستالدى» دەگەن پىكىر جازىلىپتى. بۇل فوتو قايدا تۇسىرىلگەنىن بىلمەيمىن. بىراق بۇلاي بولماۋى ءتيىس. ءبىز ءدال قازىرگى كەزدە ءبىر-بىرىمىزگە قولداۋ كورسەتۋىمىز قاجەت. وبلىس كاسىپكەرلەرىن قايىرىمدىلىق تانىتۋعا شاقىرامىن. ەڭ بولماسا, بيىل اتسالىڭىزدار», –دەدى كاسىپكەر مۇرات سارمانوۆ. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.