پەتروپاۆل. 25 قاڭتار. ءسابيت مۇقانوۆ اتىنداعى قازاق سازدى-دراما تەاترىندا ەلىمىزدىڭ جانە رەسەي, قىتاي, اۆستراليا, يتاليا, فينليانديا, تاعى باسقا شەتەلدەردەن كەلگەن ينۆەستورلاردىڭ قاتىسۋىمەن القالى جيىن ءوتىپ, 6 مەموراندۋمعا قول قويىلدى. بۇل تۋرالى egemen ءتىلشىسى حابارلايدى.
ايماق باسشىسى ەرىك سۇلتانوۆ ءوز سوزىندە قازاقستاندا ينۆەستيتسيالىق ساياساتتى وڭتايلى جۇزەگە اسىرۋدىڭ ناتيجەسىندە ەكونوميكالىق ارىپتەستىكتى ورىستەتۋ نىعايا تۇسكەنىن, وڭىردە ينۆەستورلاردى قولداۋ ماقساتىندا كەشەندى شارالار اتقارىلىپ جاتقانىن جەتكىزدى. وتكەن جىلى 154,5 ميلليارد تەڭگە مولشەرىندە ينۆەستيتسيا تارتىلىپ, ءوسىم قارقىنى جونىنەن رەسپۋبليكادا ءبىرىنشى ورىندى يەلەنگەن. قارجىگەرلەر اۋىل شارۋاشىلىق داقىلدارىن وڭدەۋ, تۋريزم, ونەركاسىپ, تابيعاتتى پايدالانۋ سالالارىنا ۇلكەن قىزىعۋشىلىق تانىتىپ وتىر.
وبلىس اكىمىنىڭ ورىنباسارى مۇحتار مانكەەۆ ءوز بايانداماسىندا ەلباسى نۇرسۇلتان نازارباەۆتىڭ ساياساتىنىڭ ارقاسىندا ەلىمىزدە ينۆەستيتسيالاردى تارتۋعا قولايلى جاعدايلار تۋدىرىلعانىن, جەرگىلىكتى جەردە جەر قويناۋىن پايدالانۋ مۇمكىندىگى زور ەكەنىن, 232 بارلانعان كەن ورنى بويىنشا 48 كەلىسىمشارت جاسالعانىن, ءتۇستى جانە سيرەك كەزدەسەتىن مەتاللدار بويىنشا دا مۇمكىندىكتەر قاراستىرىلىپ جاتقانىن اتاپ ءوتتى. قازىر ينۆەستيتسيالىق پورتفەل شامامەن 200 ميلليارد تەڭگەنى قۇرايدى. 12 جوبا اياسىندا شەتەلدىك كومپانيالارمەن كەلىسسوزدەر جۇرگىزىلۋدە. ىنتىماقتاستىقتىڭ باسىم باعىتتارىنىڭ ءبىرى قىتايمەن بىرلەسكەن ءۇش جوبانى جۇزەگە اسىرۋ بولىپ تابىلادى. ماسەلەن, اسپان استى ەلىنىڭ كاسىپكەرلەرى 2018 جىلعا قاراي عابيت مۇسىرەپوۆ اتىنداعى اۋداندا ءداندى داقىلداردى قالدىقسىز وڭدەيتىن زاۋىت سالۋدى مەجەلەپ وتىر.
«ءبىز ءۇشىن بۇل – ەلىمىزدەن تىس جاسالىپ وتىرعان العاشقى جوبا. جىلىنا 250 مىڭ توننا ءداندى داقىل وڭدەمەكپىز. 1200 جۇمىس ورنى اشىلادى. ينۆەستيتسيالار كولەمى 250 ميلليون دوللاردى قۇرايدى», – دەيدى «شي لين فۋ سين-ۋحان» كومپانياسىنىڭ باس ديرەكتورى چجان شي گان.
كەلەلى باسقوسۋدا نۆەستيتسيالار جانە دامۋ ۆيتسە-ءمينيسترى راحىم وشاقباەۆ, اۋىل شارۋاشىلىعى ءمينيسترىنىڭ ورىنباسارى ەرمەك كوشەرباەۆ, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى نۇرجان التاەۆ, «دامۋ» كاسىپكەرلىكتى دامىتۋ قورى» اكتسيونەرلىك قوعامىنىڭ باسقارما ءتورايىمى ءلاززات يبراگيموۆا, «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ ۆيتسە-پرەزيدەنتى باۋىرجان ورىنباساروۆ, قازاقستانداعى ەۋروپالىق قايتا قۇرۋ جانە دامۋ بانكىنىڭ جەتەكشى بانكيرى انتون دان-چين يۋ, فينليانديادان - كالۆەر كاپپەر, اۆستراليادان - ەليسون مورلي, رەسەيدەن - ۆلاديمير كان ءسوز الىپ, الداعى مىندەتتەر جايلى ءوز ويلارىن ورتاعا سالدى.
كەڭەس بىتكەننەن كەيىن شەتەلدىك كومپانيالارمەن ءوزارا ىنتىماقتاستىق تۋرالى بىرقاتار مەموراندۋمعا قول قويىلدى.
ءومىر ەسقالي.
دەرەك, سۋرەت: egemen.kz.
