اقتوبەدە قازاق ادەبيەتىنىڭ ابىزىن ەسكە الدى

اقتوبە. 25 قاڭتار. اقتوبە قالاسىنداعى س.بايىشەۆ اتىنداعى وبلىستىق امبەباپ-عىلىمي كىتاپحاناسى قازاقستاننىڭ حالىق جازۋشىسى, كورنەكتى مەملەكەت جانە قوعام قايراتكەرى ءابىش كەكىلباەۆتىڭ شىعارماشىلىعىنا ارنالعان «قازاق ادەبيەتىنىڭ ابىزى ەدى…» اتتى ادەبي ەسكە الۋ كەشىن ۇيىمداستىردى. بۇل تۋرالى egemen.kz ءتىلشىسى حابارلادى. ەلىمىزدىڭ ادەبي بايلىعى مەن مەملەكەت ىسىندە وشپەس ءىز قالدىرعان ءابىش كەكىلباەۆتى ەسكە الىپ, قالىڭ وقىرمان قاۋىمعا قالامگەردىڭ وتانشىلدىققا تولى ادەبي مول مۇراسىن ناسيحاتتاۋ, ءومىرى مەن شىعارماشىلىعى جايىندا سىر شەرتۋ ماقساتىندا ۇيىمداستىرىلعان كەشكە وبلىستىق مادەنيەت, مۇراعاتتار جانە قۇجاتتاما باسقارماسى باسشىسىنىڭ مىندەتىن اتقارۋشى ق.ەرمۇقان, بەلگىلى قوعام قايراتكەرى, پروفەسسور, فيلوسوفيا عىلىمدارىنىڭ دوكتورى ا.ايتالى, اقىن م.اقداۋلەت ۇلى قاتىسىپ, ءا.كەكىلباەۆتىڭ تاۋەلسىز قازاقستاننىڭ قالىپتاسۋىنا, ەلىمىزدىڭ مادەنيەتىنە, ادەبيەتىنە قوسقان ولشەۋسىز ەڭبەگى تۋرالى ايتىپ, جاستاردى قالامگەردىڭ باعا جەتپەس مول مۇرالارىن وقۋعا شاقىردى. كەش بارىسىندا تالانتتى جازۋشىنىڭ شىعارمالارى وقىلدى. كىتاپحانا قىزمەتكەرى گۇلنازيا ومارحانوۆا «ءابىش اعا, ابىز اعا» اتتى كىتاپ كورمەسىنە بيبليوگرافيالىق شولۋ جاساپ, جينالعانداردى جازۋشىنىڭ تاريحي-تانىمدىق ەڭبەكتەرىمەن تانىستىردى. شارا بارىسىندا تاقىرىپقا بايلانىستى جاستار ءسوز سويلەدى, فوتو-شەجىرە سلايد, «كەلبەت» باعدارلاماسىنان ءا.كەكىلباەۆ تۋرالى بەينەماتەريال كورسەتىلدى, قاتىسۋشىلار قالامگەردىڭ ءومىرىنىڭ سوڭعى كۇندەرىندە سويلەگەن ءسوزىن تىڭدادى. ساتىبالدى ءساۋىرباي. دەرەك, سۋرەت: egemen.kz.