قىتايدىڭ گۋانچجوۋ قالاسىندا 67 جىلدان كەيىن قار جاۋدى

استانا. 24 قاڭتار. قىتايدىڭ وڭتۇستىگىندەگى گۋاندۋن پروۆينتسياسىنىڭ اكىمشىلىك ورتالىعى گۋانچجوۋ قالاسىندا سوڭعى 67 جىل ىشىندە العاش رەت قار جاۋدى. جەرگىلىكتى باق وكىلدەرىنىڭ ايتۋىنشا, اتالعان ايماقتا 1949 جىلدان بەرى مۇنداي جاعداي بولماعان. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. قالا بيلىگى ايازدىڭ ەڭ قاۋىپتى دەڭگەيى «قىزىل» دارەجەسىن قابىلدادى. قازىرگى كەزدە گۋانچجوۋدا اۋا تەمپەراتۋراسىنىڭ ورتاشا كورسەتكىشى ءنول تسەلسي گرادۋستى كورسەتكەنىمەن, قالا حالقى ءۇشىن بۇل قاۋىپتى بولىپ ەسەپتەلەدى. وسىعان بايلانىستى باسشىلىق تۇرعىندارعا جىلى كيىنۋدى, ال جۇرگىزۋشىلەرگە اسا ساق بولۋدى ەسكەرتتى. اۋا رايىنىڭ كۇرت بۇزىلۋى اسىرەسە تۇرعىندار مەن قوممۋنالدىق قىزمەتكەرلەرگە كەرى اسەرىن تيگىزۋدە. وتكەن سەنبىدە, ياعني 23 قاڭتار كۇنى ون ەكى بىردەي اۋا رايىن بولجاۋ ستانتسياسىندا تاريحتاعى ەڭ سۋىق كۇن تىركەلدى. اسپاناستى ەلىنىڭ استاناسى پەكيندە -17,4 تسەلسي گرادۋس بولسا, قالا ايماعىنداعى ەلدى-مەكەندەردە -29,8 تسەلسي گرادۋسقا دەيىن باردى. ايان ءابدۋالي. دەرەك, سۋرەت: تاسس.