قىتاي استاناسىنىڭ ەكولوگياسى ءۇشىن 2,6 ميلليارد دوللار بولىنەدى

استانا. 24 قاڭتار. قىتاي استاناسى پەكين قالاسىنىڭ ەكولوگياسىن بىرقالىپقا ءتۇسىرۋ ءۇشىن جەرگىلىكتى بيلىك 16,5 ميلليارد يۋان (2,6 ميلليارد دوللار) كولەمىندە قارجى بولەدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. باسشىلىق وسىعان دەيىن قالا ىشىندەگى 200 مىڭ زياندى اۆتوكولىكتەن ارىلۋدىڭ جولدارىن قاراستىرعان بولاتىن. سونىمەن قاتار قالا توڭىرەگىندەگى  400 ەلدى-مەكەننىڭ دە ەكولوگيا جونىندەگى ماسەلەسىنىڭ شەشىم جولدارىن قاراستىرماق. ايتا كەتەيىك, 2015 جىلدىڭ كۇز-قىس ماۋسىمدارىندا پەكين قالاسىندا اۋانىڭ شەكتەن تىس لاستانۋىنا بايلانىستى, ەكولوگيانىڭ ەڭ جوعارعى قاۋىپتىلىك دەڭگەيى «قىزىل» جانە «سارعىلت» دارەجەسىنە بىرنەشە مارتە جەتكەن. حالىقارالىق دەنساۋلىق ساقتاۋ ۇيىمىنىڭ بەكىتكەن اۋا قۇرامىنداعى سۋسپەنزيانىڭ قاۋىپسىز سانالاتىن مولشەرى تەكشەمەترىنە 25 ميكروگرامدى قۇراۋى ءتيىس بولسا, اسپاناستى ەلىنىڭ استاناسىندا وتكەن جىلى 900 ميكروگرامدى كورسەتكىشكە دەيىن باردى. قىتاي استاناسى الەمدەگى ەڭ لاس قالالاردىڭ ءبىرى. اۋانىڭ لاستىعى ءتىپتى عارىشتان دا كورىنەدى دەگەن اقپاراتتار بار. ماماندار ونىڭ باستى سەبەبى, ەلەكتر ستانتسيالارى مەن اۆتوكولىكتەردىڭ شەكتەن تىس كوپ بولۋىنان دەگەن شەشىم شىعاردى. ايان ءابدۋالي. دەرەك, سۋرەت: تاسس.