تاجىكستان پارلامەنتى راحموننىڭ شەكسىز رەت سايلانۋىنا رۇقسات بەردى

استانا. 23 قاڭتار. تاجىكستان پارلامەنتىنىڭ تومەنگى پالاتاسى كونستيتۋتسياعا رەسپۋبليكا باسشىسى ەمومالي راحموننىڭ شەك قويىلمايتىن مولشەردە سايلاۋعا تۇسۋىنە مۇمكىندىك بەرەتىن تۇزەتۋدى بەكىتىپ بەردى. بۇل تۋرالى ras.kz-كە سىلتەمە جاساعان egemen.kz حابارلادى. بۇعان دەيىن ەل كونستيتۋتسياسىنىڭ 65-بابى ءبىر تۇلعانىڭ قاتارىنان ەكى رەتتەن ارتىق پرەزيدەنت بولۋىنا تىيىم سالاتىن ەدى. ەندى قوسىمشا «بەيبىتشىلىك پەن ۇلت بىرلىگىنىڭ نەگىزىن قالاۋشى – ۇلت كوشباسشىسىنا» اتالعان باپتىڭ ءتورتىنشى تارماعىندا قاراستىرىلعان بۇل شەكتەۋدىڭ جۇرمەيتىنىن» اشىپ كورسەتىپ وتىر. ال «بەيبىتشىلىك پەن ۇلت بىرىلىگىنىڭ نەگىزىن قالاۋشى – ۇلت كوشباسشىسىنىڭ قۇقىقتىق مارتەبەسى مەن ۋاكىلەتتىكتەرىن كونستيتۋتسيالىق زاڭنىڭ قامتاماسىز ەتەتىنى» اشىپ جازىلعان. تۇزەتۋلەر سونداي-اق, كانديدات ءۇشىن شەكتەۋلى جاس مولشەرىنىڭ 35-تەن 30-عا دەيىن تۇسىرىلەتىنىن دە قاراستىرعان. ەسكە سالا كەتەيىك, پارلامەنت «بەيبىتشىلىك پەن ۇلت بىرلىگىنىڭ نەگىزىن قالاۋشى – ۇلت كوشباسشىسى تۋرالى» زاڭدى 2015 جىلعى 30 جەلتوقساندا قابىلداعان بولاتىن. وسى وزگەرىستەر سونداي-اق, رەسپۋبليكا پرەزيدەنتى ەمومالي راحموننىڭ ۇلكەن ۇلى رۋستام ەموماليدىڭ 2020 جىلى وتەتىن پرەزيدەنت سايلاۋىندا ءوزىنىڭ كانديداتۋراسىن ۇسىنۋىنا مۇمكىندىك بەرەدى. سول جىلى ونىڭ جاسى 33-كە كەلەدى. دەمەك, قولدانىستاعى ەندىگى كونستيتۋتسياعا سايكەس, رۋستام ءوزىن مەملەكەت باسشىسىنىڭ ورىنتاعىنا ۇسىنا الادى. دەپۋتاتتار قولداۋ كورسەتكەن بۇل تۇزەتۋلەردىڭ بارلىعى رەسپۋبليكا كونستيتۋتسيالىق سوتىنىڭ ساراپتاماسىنا جىبەرىلەدى. سودان كەيىن «تاجىكستان كونستيتۋتسياسىنا وزگەرتۋلەر مەن قوسىمشالار ەنگىزۋ تۋرالى» زاڭنىڭ جوباسىن تالقىلايتىن بۇكىلحالىقتىق رەفەرەندۋمنىڭ وتكىزىلەتىن مەرزىم بەلگىلەنەدى. تالعات رايىمبەك. دەرەك, سۋرەت: ras.kz.