اقتوبەلىك ارداگەرلەر باس قوستى

اقتوبە. 21 قاڭتار. اقتوبە قالالىق ارداگەرلەر ۇيىمىنىڭ توراعاسى قايتا سايلاندى. بۇل تۋرالى egemen.kz ءتىلشىسى حابارلادى. ۇيىمنىڭ ءحى ەسەپ بەرۋ-سايلاۋ كونفەرەنتسياسىندا قالا اكىمى بەكبول ساعىن جەرگىلىكتى اتقارۋشى ورگانداردىڭ شاھاردىڭ الەۋمەتتىك-ەكونوميكالىق دامۋى جولىنداعى جانە ەلباسىنىڭ قازاقستان حالقىنا ارنالعان «قازاقستان جاڭا جاھاندىق ناقتى احۋالدا: ءوسۋ, رەفورمالار, دامۋ» اتتى جولداۋىندا قويىلعان تاپسىرمالاردى جۇزەگە اسىرۋ بارىسىنداعى جۇمىستارىنا توقتالدى. سونىمەن قاتار, قالا باسشىسى اقتوبە قالاسىندا تۇراتىن ەگدە جاستاعى ازاماتتاردىڭ قالانىڭ قوعامدىق ومىرىنە بەلسەندى اتسالىساتىندىقتارىن اتاپ ءوتتى جانە ارداگەرلەرگە قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا بىرلەسىپ, تابىستى جۇمىستار اتقارۋ تۋرالى تىلەگىن جەتكىزدى. قالالىق ارداگەرلەر كەڭەسىنىڭ توراعاسى, اقتوبە قالاسىنىڭ قۇرمەتتى ازاماتى الەكساندر پريحنو قالالىق ارداگەرلەر كەڭەسىنىڭ 2010-2015 جىلدار ارالىعىندا اتقارعان جۇمىستارى تۋرالى باياندادى. بۇگىندە اقتوبەدە 20 مىڭنان استام ارداگەرلەر مەن زەينەتكەرلەردەن تۇراتىن 86 باستاۋىش ارداگەرلەر ۇيىمى بار. قالادا جانە وعان قاراستى اۋىلدىق وكرۋگتەردە 112 ۇلى وتان سوعىسىنىڭ ارداگەرى, 4173 تىل ارداگەرلەرى تۇرادى. قالالىق ارداگەرلەر ۇيىمى قىزمەتىنىڭ باستى باعىتتارىنىڭ ءبىرى – قالانىڭ قوعامدىق-ساياسي ومىرىنە بەلسەندى ارالاسۋ, ارداگەرلەر مەن زەينەتكەرلەردىڭ الەۋمەتتىك ماسەلەلەرىن شەشۋ, مەكتەپتەردە, مۋزەيلەردە جاستاردى پاتريوتتىققا تاربيەلەۋ. قالالىق ارداگەرلەر كەڭەسىنىڭ توراعاسى بولىپ الەكساندر پريحنو (سۋرەتتە) قايتا سايلاندى. ساتىبالدى ءساۋىرباي. دەرەك: egemen.kz. سۋرەت: aktobetimes.kz.