«بارىس» ومبىنىڭ «اۆانگاردىنان» ويسىراي جەڭىلدى

استانا. 21 قاڭتار. قۇرلىقتىق حوككەي ليگاسى شەڭبەرىندە «بارىس» ومبىنىڭ «اۆانگاردىنان» ويسىراي جەڭىلدى. استانادا وتكەن كەزدەسۋدە ماتچ قوناقتاردىڭ پايداسىنا 7:2 ەسەبىمەن اياقتالدى. بۇل تۋرالى egemen.kz ءتىلشىسى حابارلادى. «ءا» دەگەننەن ومبىلىقتار باسىمدىققا يە بولىپ, جويقىن شابۋىلدار ۇيىمداستىردى. ناتيجەسىندە العاشقى 9 مينۋتتا «اۆانگارد» ويىنشىلارى 3 شايبا سوقتى. الدىمەن 1-مينۋتتا ۆلاديمير سوبوتكا ەسەپ اشسا, ارادا بار بولعانى 2 مينۋتقا جەتەر-جەتپەس ۋاقىت وتكەندە, ۆلاديمير ميحەەۆ تابلوداعى كورسەتكىشتى 2:0-گە جەتكىزدى. ال 9-مينۋتتا سوبوتكا ءدۋبلدىڭ اۆتورى اتاندى. بۇنىمەن دە شەكتەلمەگەن رەسەيلىكتەر ۇزىلىسكە دەيىن ءبىزدىڭ قاقپاعا تاعى ءبىر شايبا ەنگىزدى. اتاپ ايتقاندا, 18-مينۋتتا شابۋىلشى نيكولاي لەمتيۋگوۆ ەسەپتى ۇلعايتتى. ءىرى ەسەپپەن العا شىققان قوناقتار ەكىنشى كەزەڭدە دە قارقىنىن باسەڭدەتپەدى. ءبىرىنشى بولىكتىڭ نۇكتەسىن قويعان لەمتيۋگوۆ بۇل كەزەڭدە العاش بولىپ گول سوقتى (22-مينۋت). ابىروي بولعاندا, استانالىقتار 28-مينۋتتا نايدجەل دوۋستىڭ كومەگىمەن ءبىر شايبا سوعىپ, ەسەپ ايىرماسىن قىسقارتتى. ءتىپتى ءۇشىنشى كەزەڭدە, ياعني, 54-مينۋتتا «بارىس» ساپىنان رومان ستارچەنكو مەرگەندىگىمەن كوزگە ءتۇسىپ, جانكۇيەرلەرگە ءۇمىت سىيلاعان ەدى. الايدا, اندرەي نازاروۆ شاكىرتتەرىنىڭ ودان ارىگە شامالارى جەتپەدى. ەسەسىنە, «اۆانگارد» سوڭعى سەكۋندقا دەيىن ويناپ, تاعى ەكى گول سوقتى. بۇل جولى يۋري الەكساندروۆ (58-مينۋت) پەن يۆان فيششەنكو (60-مينۋت) ەنشىلەرىنە ءبىر گولدان جازدى. وسىلايشا, «بارىس» ماۋسىمداعى 27-جەڭىلىسىنە ۇشىرادى. ويىن بارىسىندا ەستە قالعان باسقا ەپيزودتارعا كەلەر بولساق, 35-مينۋتتا ءبىزدىڭ تافگاي دامير رىسپاەۆ قارسىلاستىڭ قورعاۋشىسى ميحال كەمپنيگە قارسى دورەكى وينادى. ول ازداي, ومبىلىققا جۇدىرىعىن الا جۇگىرگەن رىسپاەۆتى تورەشى ويىن سوڭىنا دەيىن ايدىننان قۋدى. سونىمەن قاتار, ويىننىڭ العاشقى 2 مينۋتىندا «بارىستىڭ» قاقپاسىن يان لاتسو كۇزەتسە, 3-مينۋتتان 22-مينۋتقا دەيىن جاتتىقتىرۋشىلار پاۆەل پولۋەكتوۆقا سەنىم ارتتى. دەگەنمەن, ول دا وزىنە ارتىلعان مىندەتتى ويداعىداي ورىنداعان جوق. سوعان وراي قالعان ۋاقىتتا قاقپاعا يان لاتسو تۇردى. بۇگىندە قورجىنىندا 78 ۇپايى بار «بارىس» شىعىس كونفەرەنتسياسىندا 7-ورىندا كەلەدى. ەلوردالىقتار كەلەسى كەزدەسۋلەرىن 25 قاڭتاردا ءوز ايدىنىندا نيجنەكامسكىنىڭ «نەفتەحيميگىمەن» وتكىزەدى. ەلامان قوڭىر. دەرەك: egemen.kz. سۋرەت: hcbarys.kz.