مەملەكەتتى كاسىبيلەندىرۋگە باعىتتالعان جوسپار

ەلباسى نۇرسۇلتان نازارباەۆ «ۇلت جوسپارى – قازاقستاندىق ارمانعا باستايتىن جول» اتتى ماقا­لاسىندا ەڭ ۇلى قۇندىلىعىمىز – تاۋەلسىزدىكتىڭ 25 جىلدىعىنا جاڭا قازاقستاندىق ارمانمەن قادام باسقانىمىزدى, ونىڭ باستى ماقساتى جۇزەگە اسىرىلىپ جاتقان «قازاقستان-2050» ستراتەگياسىمەن بارا-بار ەكەنىن اتاپ كورسەتتى. بۇل اتالعان ماقالانىڭ كوتەرگەن جۇگىنىڭ قانشالىقتى سالماقتى ەكەنىن باعامداپ تۇر. الەمنىڭ دامىعان 30 ەلىنىڭ قاتارىنا ەنۋدى كوزدەيتىن ستراتەگيانى جۇزەگە اسىرۋ اياسىندا مەملەكەتىمىزدە اۋقىمدى وزگەرىستەر ورىن الۋدا. سونىڭ ءبىرى جەمقورلىققا قارسى قۇرالدار مەن تەتىكتەردى, ينستيتۋتتاردى جاڭارتۋ قاجەتتىلىگى ورايىندا اتقارىلعان جۇيەلى جۇمىستار دەر ەدىك. بۇل سالاداعى نەگىزگى ناتيجە جەمقورلىقتىڭ سالدارىمەن كۇرەسكە ەمەس, ونىڭ الدىن الۋعا باعىتتالۋىمەن ەرەكشەلەنىپ وتىر. ەلباسى ايتقان جاڭا قازاقستاندىق ارمانعا جاقىنداتا تۇسەتىن بەس ينستيتۋتتىق رەفورما مەن «100 ناقتى قادامدى» جانە جولداۋدى جۇزەگە اسىرۋدان تۋاتىن مىندەتتەر مەن تاپسىرمالاردى تاعى ءبىر سارالاعان تولعامدى ماقالانىڭ ماڭىزى زور. پرەزيدەنت ماقالاسىندا ءبىزدىڭ دەپارتامەنتىمىز اتقارۋعا ءتيىستى بىرقاتار جۇمىستار تايعا تاڭبا باسقانداي ايقىن كورسەتىلگەن. «مەملەكەتتى كاسىبيلەندىرۋ» دەگەن ارنايى تاراۋىندا قازاقستاندىق مەملەكەتتىك قىزمەتتى دامىتۋدىڭ جاڭا كەزەڭى باستالعانى ايتىلۋى بەكەر ەمەس. ماسەلەن, جۋىردا مەملەكەت باسشىسىنىڭ جارلىعىمەن مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگى مەملەكەتتىك قىزمەت ىستەرى مينيسترلىگى بولىپ, ونىڭ قۇرى­لىمىندا جەمقورلىققا قارسى ءىس-قيمىلدىڭ ۇلتتىق بيۋروسى قۇرىلدى. ءبىر جىلدان اسا ۋاقىت بۇرىن, ياعني 2014 جىلدىڭ 26 جەلتوقسانىندا جەمقورلىققا قارسى ءتيىمدى ساياساتتى ەنگىزۋ جانە ونىڭ كەز كەلگەن بوي كورسەتۋىنە «توزبەۋشىلىك» جاعدايىن قالىپتاستىرۋ ماق­ساتىندا پرەزيدەنت جاڭادان «جەم­قورلىققا قارسى ستراتەگيانى» بە­كىتتى. بۇل مەملەكەت باسشىسىنىڭ تاپسىرمالارىن, «قازاقستان-2050» ستراتەگياسىن جۇزەگە اسىرۋ شەڭ­بەرىندەگى قازىرگى قازاقستاندىق قوعام تالاپتارىنا جاۋاپ بەرە الاتىن جانە جاڭا ساياسي مىندەتتەرمەن تىعىز بايلانىستى قۇجات بولدى. وسىعان وراي, 2015-2017 جىلدارعا ارنالعان رەسپۋبليكالىق جانە وڭىرلىك ءىس-شارالار جوسپارى قابىل­داندى. وتكەن جىلى كادر سايا­ساتىن ءتيىمدى جۇزەگە اسىرۋعا نەگىز بولاتىن «ە-قىزمەت» اقپاراتتىق جۇيەسىن مەملەكەتتىك ورگاندارعا ەنگىزۋ بويىنشا بەلسەندى جۇمىس جۇرگىزىلىپ, شىعىس قازاقستان وبلى­سىنداعى مەملەكەتتىك ورگاندار اتالعان اۆتوماتتاندىرۋ جۇيەسىمەن تولىق قامتىلدى. دەپارتامەنتىمىزدىڭ نەگىزگى قىز­مەتىنىڭ ءبىرى – مەملەكەتتىك قىز­مەت سالاسىنداعى بىرىڭعاي سايا­ساتتى جۇزەگە اسىرۋ. وسى ورايدا مەملەكەتتىك ورگاندار كادرلارىنىڭ جاعدايىنا تۇراقتى تۇردە مونيتورينگ جۇرگىزىلىپ تۇرادى. ايتالىق, بىلتىر 4844 مەملەكەتتىك قىزمەتكە ۇمىتكەر تەستىلەۋگە قاتىسىپ, ولار­دىڭ ىشىنەن 1574-ءى, ياعني 32 پايىزى تەستىلەۋدىڭ شەكتى دەڭگەيىنەن ءوتتى. جۇرگىزىلگەن ساراپتامالار تەستى­لەۋ كەزىندە ۇمىتكەردىڭ باسقا زاڭنامالاردى جەتىك بىلسە دە, ءبىر زاڭ بويىنشا شەكتىك دەڭگەيدەن وتە الماي قالاتىنىن انىقتادى. وسى ورايدا استاناعا تەستىلەۋ باعدارلاماسىن جەتىلدىرۋگە بايلانىس­تى ءوز ۇسى­نىستارىمىزدى جولدادىق. ەلباسى ماقالاسىندا ايتىلعان, جاڭا جىلدان باستاپ كۇشىنە ەنگەن جاڭا زاڭ مەملەكەتتىك قىزمەتتىڭ جاڭارتىلعان مودەلىن ۇسىنىپ وتىر. مەملەكەتتىك قىزمەت جۇيەسىمەن بىرگە جەمقورلىق كورىنىستەرىنىڭ بارىنشا الدىن الۋعا باعىتتالعان جۇيە دە جاڭعىرتىلىپ, 1 قاڭتاردان باستاپ جاڭا زاڭناما كۇشىنە ەندى. ەلباسى جەمقورلىقپەن كۇرەستى دايەكتى جانە جۇيەلى سيپاتپەن جۇرگىزەتىن جاڭا زاڭناما­نىڭ حالىقارالىق تالاپتارعا سايكەس ەكەنىن اتاپ ءوتتى. وسىعان وراي, دەپارتامەنتتە قوعامنىڭ ءار ءمۇ­شەسىنىڭ جەمقورلىققا قارسى ازا­ماتتىق ساناسىنىڭ ويانۋىنا, جەم­قورلىق قۇبىلىستاردى تۋىنداتاتىن جاعدايلاردىڭ الدىن الۋعا باعىتتالعان جەمقورلىققا قارسى اعارتۋ جانە قوعاممەن بايلانىس ءبولىمى قۇرىلىپ, جۇمىس ىستەۋدە. بىلتىر جەمقورلىققا قارسى مەملەكەتتىك ساياساتتى ءتۇسىندىرۋ ماق­ساتىندا اقپارات قۇرالدارىندا 400-دەن استام ماقالا جارىق كورىپ, مەملەكەتتىك ورگاندار مەن ءبىلىم نىساندارىندا 500-دەن استام سەمينارلار مەن دارىستەر, كەزدەسۋلەر مەن القاقوتان اڭگىمەلەر, ەلدى مەكەندەردە كوشپەلى ماجىلىستەر ءوتتى. ازاماتتىق قوعام ينستيتۋتتارى دا اتالعان جۇمىسقا تارتىلىپ, جەمقورلىققا قارسى ءىس-قيمىل سالاسىنداعى ارىپتەستىك تۋرالى مە­مو­راندۋمدار قابىلداندى. «نۇر وتان» پارتياسىنىڭ وبلىستىق فيليالى مەن دەپارتامەنت جانە اۋدان اراسىندا قابىلدانعان ۇشجاقتى مەموراندۋم بويىنشا اباي اۋدانى مەن كۋرچاتوۆ قالاسى جەمقورلىقتان تىس ايماق رەتىندە جاريالاندى. دەپارتامەنتتىڭ ۇيىتقى بولۋىمەن وتكەن اۋقىمدى ءىس-شارالار قاتارىندا باق وكىلدەرىمەن جانە جەتەكشىلەرىمەن كەزدەسۋ, «جاستار – جەمقورلىققا قارسى» اتتى كوڭىلدى تاپقىرلار ويىنى, «قازاقستان رەسپۋبليكاسىنداعى جەمقورلىققا قارسى ساياسات: عىلىمي, قۇقىقتىق جانە ەكونوميكالىق قىرى» اتتى رەسپۋبليكالىق كونفەرەنتسيا, «ۇزدىك مەملەكەتتىك قىزمەتشى – 2015» بايقاۋى, «گالستۋكسىز كەزدەسۋ» اتتى جاس مەملەكەتتىك قىزمەتشىلەرمەن كەزدەسۋلەردى ايتۋعا بولادى. ارينە, جەمقورلىققا بوي الدىرعاندارعا اۋەلگى كەزەكتە ءۇل­كەن كولەمدەگى ايىپپۇل سالۋ ار­قىلى قاتاڭ شارا قولدانىلادى. بىلتىر 71 لاۋازىمدى تۇلعا, ونىڭ ىشىندە 28 جەتەكشى قىلمىستىق جاۋاپكەرشىلىككە تارتىلىپ, كەل­تىرىلگەن شىعىن قايتارىلدى. جاھاندانۋ زامانىنىڭ تالاپتارىنا ساي, ەلىمىزدە وسىنداي وڭدى وزگەرىستەر ورىن الىپ, وركەنيەتتى ەلدەردىڭ قاتارىنا ءبىر ەمەس, ءجۇز قادامعا جاقىنداۋدىڭ مۇمكىندىگى تۋىپ وتىر. سوندىقتان, بارشاڭىزدى ەلباسىنىڭ ماقالاسىنداعى ما­ڭىزدى مىندەتتەردى ءساتتى ىسكە اسىرۋ ءۇشىن ءوز ۇلەستەرىڭىزدى قوسۋعا, مەم­لەكەتتىك قىزمەت مارتەبەسىن جاڭا بيىككە كوتەرۋگە جانە سىبايلاس جەمقورلىقسىز قازاقستاندىق قوعام قۇرۋعا بارىنشا قولداۋ كورسەتۋگە شاقىرامىن. عالىمبەك دوسانوۆ, شىعىس قازاقستان وبلىستىق مەملەكەتتىك قىزمەت جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى. وسكەمەن.