بوليۆيادا زيكا بەزگەگىن جۇقتىرعان ادام تابىلدى

استانا. 20 قاڭتار. بوليۆيانىڭ پورتاچۋەلو قالاشىعىندا زيكا بەزگەگىن جۇقتىرعان العاشقى ادام تابىلدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. بۇل اۋرۋعا جۇكتىلىكتىڭ سەگىزىنشى اي مەرزىمىندەگى ايەل شالدىققان. قازىر ناۋقاس سانتا-كرۋس قالاسىنداعى بىلىكتى دارىگەرلەردىڭ باقىلاۋىندا. بوليۆيانىڭ ەپيدەميالىق ورتالىعىنىڭ باسشىسى رودولفو روكوبادو قۇرساقتا جاتقان نارەستەنىڭ قاۋىپتى اۋرۋدان ءدىن امان ەكەنىن مالىمدەدى. ونىڭ ايتۋىنشا, بەزگەك جاتىر ىشىندەگى بالانىڭ العاشقى ءۇش ايىنا دەيىن زيانىن تيگىزەدى. زيكا بەزگەگى جۇكتى ايەلدەر ءۇشىن اسا قاۋىپتى. قاتەرلى ىندەتكە شالدىققان بولاشاق انادان ميكروتسەفاليا اۋرۋىنا شالدىققان نارەستە دۇنيەگە كەلۋى مۇمكىن. ول وز كەزەگىندە بالانىڭ باس سۇيەگى مولشەرىنەن تىس كىشىرەيىپ, مي قۇرىلىسىنىڭ دامۋىنا زيانىن تيگىزەدى. ءبىر عانا برازيليادا ميكروتسەفاليامەن وتكەن جىلى 3500-گە جۋىق نارەستە دۇنيەگە كەلگەن. بۇل كورسەتكىش 2014 جىلمەن سالىستىرعاندا 20 ەسەگە كوپ. ايتا كەتەيىك, وتكەن اپتادا اقش ماماندارى اتالعان بەزگەكتىڭ وڭتۇستىك جانە ورتالىق امەريكادا ورنالاسقان 14 مەملەكەتكە تاراعانىن حابارلاعان. ولاردىڭ ايتۋىنشا, اسىرەسە برازيليا, كولۋمبيا, ۆەنەسۋەلا جانە مەكسيكا ەلدەرى زارداپ شەگۋدە. زيكا بەزگەگى العاش رەت 1947 جىلى ۋگاندا مەملەكەتىندە پايدا بولدى. وسىدان سوڭ تەك افريكا ەلدەرىنە عانا تاراعان. اۋرۋدى العاشقى كەزەڭىندە انىقتاپ ءبىلۋ مۇمكىن ەمەس. سەبەبى, بەلگىلەرى اشىق تۇردە بىلىنبەيدى. دەنە قىزۋى ازداپ كوتەرىلىپ, باس اۋرۋى, بۋىن جانە بەل اۋرۋلارى, شارشاۋ بەلگىلەرى پايدا بولادى. ال اۋرۋدىڭ تاراۋىنا نەگىزىنەن Aedes aegypti تۇرىندەگى ماسالار سەبەپشى بولادى. ايان ءابدۋالي. دەرەك: تاسس. سۋرەت: livemint.com.