پارلامەنت ءماجىلىسىنىڭ سايلاۋى بيىلعى 20 ناۋرىزدا وتەتىن بولدى

استانا. 20 قاڭتار. بۇگىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ بەسىنشى شاقىرىلعان قازاقستان رەسپۋبليكاسى پارلامەنتىنىڭ ءماجىلىسىن تاراتۋ جانە قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. بۇل تۋرالى اقوردانىڭ ءباسپاسوز قىزمەتى حابارلادى. جارلىق قازاقستان رەسپۋبليكاسى كونستيتۋتسياسىنىڭ 44-بابىنىڭ 2) تارماقشاسىنا, 63-بابىنىڭ 1-تارماعىنا, «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 85-بابىنا نەگىزدەلىپ شىعارىلدى. وندا بەسىنشى شاقىرىلعان پارلامەنت ءماجىلىسىن تاراتۋ, پارتيالىق تىزىمدەر بويىنشا سايلاناتىن پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن 2016 جىلعى 20 ناۋرىزعا تاعايىنداۋ, قازاقستان حالقى اسسامبلەياسى سايلايتىن قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن 2016 جىلعى 21 ناۋرىزعا تاعايىنداۋ اتاپ كورسەتىلگەن. قاۋلىدا سونداي-اق قازاقستان رەسپۋبليكاسى ورتالىق سايلاۋ كوميسسياسىنا پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن دايىنداۋدى جانە وتكىزۋدى ۇيىمداستىرۋ تاپسىرىلعان. وسىعان وراي قازاقستان رەسپۋبليكاسىنىڭ ۇكىمەتىنە, استانا جانە الماتى قالالارىنىڭ, وبلىستاردىڭ اكىمدەرىنە پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن ۇيىمدىق, ماتەريالدىق-تەحنيكالىق جانە قارجىلىق قامتاماسىز ەتۋ جونىندەگى بارلىق قاجەتتى شارالاردى كىدىرىسسىز قابىلداۋ جۇكتەلگەن. جارلىق بۇگىننەن باستاپ كۇشىنە ەندى. ەلامان قوڭىر. دەرەك, فوتو: اقوردا سايتى.