قازاقستان كونفەدەراتسياسى «التىن ارىپتەس» اتاندى

استانا. 20 قاڭتار. سپورتتىق جەكپە-جەك جانە كۇش قولدانالاتىن سپورت تۇرلەرى كونفەدەراتسياسى ءۇشىنشى جىل قاتارىنان SportAccord حالىقارالىق كونۆەنتسياسىنىڭ «التىن ارىپتەسى» اتاندى. بۇل تۋرالى egemen.kz ءتىلشىسى حابارلادى. كونفەدەراتسيانىڭ حالىقارالىق بايلانىستار جونىندەگى ۇيلەستىرۋشىسى ءالىمجان اقاەۆ شۆەيتساريادا «التىن ارىپتەستىكتى» راستايتىن قۇجاتتى SportAccord كونۆەنتسياسىنىڭ باسشىلىعىنا تابىس ەتتى. بيىل SportAccord حالىقارالىق كونۆەنتسياسى 17-22 ءساۋىر كۇندەرى شۆەيتساريانىڭ لوزاننا قالاسىندا وتەدى. ونىڭ جۇمىسىنا جەر-ءجۇزىنىڭ 100-دەن استام حالىقارالىق سپورت قاۋىمداستىقتارى مەن فەدەراتسيالارى, سپورت ۇيىمدارى قاتىسادى. وسى باسقوسۋدا كورمە دە وتەدى. ونىڭ ءبىر بۇرىشىندا سپورتتىق جەكپە-جەك جانە كۇش قولدانالاتىن سپورت تۇرلەرى كونفەدەراتسياسى ەلىمىز تۋرالى كورمەسى ۇيىمداستىرادى. كورمەگە «قازمۇنايگاز» اق ۇلتتىق كومپانياسى دەمەۋشىلىك جاسايدى. SportAccord حالىقارالىق كونۆەنتسياسى 1967 جىلدىڭ 21 ءساۋىر كۇنى قۇرىلعان. ول وليمپيادا باعدارلاماسىنا كىرەتىن جانە كىرمەيتىن سپورت تۇرلەرىنەن حالىقارالىق فەدەراتسيالاردىڭ باسىن بىرىكتىرەدى. كونۆەنتسيانىڭ پرەزيدەنتى – فرانچەسكو ريچچي-بيتتي. ول 2015 جىلى قايتا سايلانعان. سونىمەن بىرگە ول حالىقارالىق جازعى وليمپيالىق سپورت تۇرەلرى فەدەراتسياسىنىڭ قاۋىمداستىعىن باسقارادى. داستان كەنجالين. دەرەك, سۋرەت: سپورتتىق جەكپە-جەك جانە كۇش قولدانالاتىن سپورت تۇرلەرى كونفەدەراتسياسى.