فيفا بلاتتەرگە جالاقى تولەۋىن توقتاتقان جوق

استانا. 19 قاڭتار. حالىقارالىق فۋتبول فەدەراتسياسىنىڭ (فيفا) بۇرىنعى پرەزيدەنتى يوزەف بلاتتەر فۋتبول سالاسىندا قىزمەت اتقارۋعا تىيىم سالىنعانىنا قاراماستان, اتالعان ۇيىمنان ءالى جالاقى الىپ كەلەدى. بۇل تۋرالى Reuters اگەنتتىگىنە سىلتەمە جاساعان egemen.kz ءتىلشىسى حابارلادى. وتكەن جىلدىڭ جەلتوقسان ايىندا فيفا-نىڭ ەتيكا جونىندەگى كوميتەتى 1998 جىلدان بەرى ۇيىمدى باسقارىپ كەلگەن بلاتتەردى فۋتبولدان 8 جىلعا الاستاۋ تۋرالى شەشىم شىعارعان بولاتىن. ودان بولەك, فيفا-نىڭ ۆيتسە-پرەزيدەنتى, ەۋروپا فۋتبول قاۋىمداستىقتارى وداعىنىڭ (ۋەفا) باسشىسى ميشەل پلاتيني دە سونداي مەرزىمگە شەتتەتىلدى. اتالعان كوميتەتكە قاراستى تەرگەۋ پالاتاسىنىڭ ءباسپاسوز-حاتشى اندرەاس بانتەل مالىمدەگەندەي, بلاتتەردىڭ جالاقى الۋى ەشقانداي زاڭعا قايشى ەمەس. بۇل جونىندە ول: «ۇيىمنىڭ جاڭا پرەزيدەنتىن سايلاۋ 26 اقپاندا وتەدى. ال ول مەرزىمگە دەيىن يوزەف بلاتتەر فيفا-نىڭ زاڭدى تۇردە سايلانعان پرەزيدەنتى بولىپ سانالادى. سوندىقتان كەلەسى سايلاۋعا دەيىن ول كەلىسىمشارتتا كورسەتىلگەندەي جالاقى الىپ تۇرۋعا تولىق قۇقىلى», – دەدى. وتكەن جىلدىڭ قىركۇيەك ايىندا شۆەيتساريا پروكۋراتۋراسى ءپلاتينيدىڭ ەسەپشوتىنا 2 ملن. شۆەيتساريا فرانكىن اۋدارعانى ءۇشىن بلاتتەرگە قاتىستى ءىس قوزعاعان ەدى. اقشا 2011 جىلى اۋدارىلعان. بۇل فرانتسۋزدىڭ 1999-2002 جىلدار ارالىعىندا كورسەتكەن قىزمەتى ءۇشىن تولەنگەن قارجى. الايدا, قوس تاراپ بۇل ارەكەتتەرىن قاعاز جۇزىندە بەكىتپەگەن. ايتا كەتەيىك, بۇگىندە بلاتتەر مەن پلاتينيدەن جەمقورلىققا قاتىستى تاعىلعان بارلىق ايىپ الىنىپ تاستالدى. الايدا, ولاردىڭ ەكەۋى دە سىيلىق قابىلداۋ, ادالدىق, جالپى ءتارتىپ ەرەجەلەرى, مۇددەلەر قاقتىعىسى سىندى فيفا-نىڭ ەتيكا كودەكسىندەگى كەيبىر تارماقتاردى بۇزعانى ءۇشىن كىنالى دەپ تانىلىپ وتىر. ەلامان قوڭىر. دەرەك: reuters.com. سۋرەت: gazeta.ru.