تاعىلىمى مول تاماشا كەش

كەڭ بايتاق قازاقستاندا ءارتۇرلى جيىندار مەن شىعارماشىلىق كەشتەردىڭ ءوتىپ جاتۋى ارنايى ءسوز ەتەتىندەي وقيعا ەمەس, دەسەك تە, «بۇل ءان بۇرىنعى اننەن وزگەرەك» دەپ شاكارىم ايتقانداي, جاقىندا الماتىداعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە جازۋشى, مەملەكەتتىك سىيلىقتىڭ لاۋرەاتى ءسابيت دوسانوۆتىڭ تۇركيا مەن ازەربايجاندا جارىق كورگەن ايگىلى «اق ارۋانا» كىتابىنىڭ تۇساۋكەسەرىنە جانە تۇركيانىڭ اسا بەدەلدى ەكى بىردەي سىيلىعىن تاپسىرۋعا ارنالعان ادەبي كەشتىڭ تاعىلىمى مەن تاربيەلىك ءمانى زور بولدى. «اق ارۋانانى» تۇرىك تىلىنە اۋدار­عان تۇرىكتىڭ كورنەكتى جازۋشىسى يمدات افشار ءسابيت دو­سا­نوۆقا تۇركيانىڭ اسا بەدەلدى ەكى بىردەي سىيلىعىن – «تۇرىك الە­مى­نە سىڭىرگەن ەڭبەگى ءۇشىن» ءجا­نە ءتۇ­رىك الەمى ادەبي قورىنىڭ «ادە­بي كەڭىستىكتى كەڭەيتكەنى ءۇشىن» سىي­لىق­تارىن تاپسىردى. وسى ادەبي كەشكە الىستان ات ارىتىپ كەلگەن ازەربايجان جازۋشىسى ەلحان زال, رەسەي جازۋشىلار وداعى مەن ءماس­كەۋدەگى قازاق دياسپوراسىنىڭ ءسا­لەمىن جەتكىزگەن ماسكەۋ ۋنيۆەر­سيتەتىنىڭ پروفەسسورى, اكادەميك سەرىك تويعامباەۆ, قىرعىزستان پرە­­زيدەنتى سىيلىعىنىڭ لاۋرەاتى, تۋ­ىسقان قىرعىزدىڭ شوڭ اقىنى مارحاباي ااماتوۆ, وزبەكستاننىڭ كورنەكتى قالامگەرى مەحمانقۇل يس­لامقۇلوۆ, قازاقستان جازۋشىلار وداعى باسقارما توراعاسى عالىم جايلىباي, الماتى قالاسى اكى­مىنىڭ وكىلى ماماي احەت, «اق جول» دەموكراتيالىق پارتياسى ءتور­اع­اسىنىڭ ءبىرىنشى ورىنباسارى, اقىن قازىبەك يسا, اباي اتىنداعى قا­زاق ۇلتتىق پەداگوگيكالىق ۋني­ۆەرسيتەتىنىڭ رەكتورى, الماتى قا­­­لالىق ءماسليحاتىنىڭ دەپۋتا­تى سەرىك پىراليەۆ, قوستاناي, با­تىس قازاقستان وبلىسى مەن اس­تا­نا قا­لا­سىنان كەلگەن دەلەگاتسيا وكىل­دەرى ءسابيت دوسانوۆتىڭ شى­عار­ماشىلىعى, قوعامدىق قىزمەتى جايلى تولىمدى ويلار تولعادى. ۋنيۆەرسيتەت رەكتورى سەرىك ءپىر­اليەۆ عىلىمي كەڭەستىڭ شەشى­مىمەن ءسابيت دوسانوۆقا «اباي اتىن­داعى قازۇپۋ-دىڭ قۇرمەتتى پروفەسسورى» دەگەن اتاق بەرىلگەنىن ايتتى, ال قازىبەك يسا جازۋشىنىڭ ومىراۋىنا «قازاق حاندىعىنا-550 جىل» كۇمىس مەدالىن تاقتى. جيىن سوڭىندا ءسوز العان ءسابيت دوسانوۆ ەلىمىزدە بۇگىنگىدەي ادەبي كەشتەر مەن مەرەيتويلاردىڭ ءوتىپ جاتۋى تاۋەلسىزدىك پەن سول تاۋەلسىزدىك تۋىن تىك ۇستاپ كەلە جاتقان پرە­زي­دەنت ن.ءا.نازارباەۆتىڭ دانا سايا­سا­تىنىڭ, ەڭبەككەر قازاق حالقى­نىڭ كەڭپەيىلدىگى ارقاسىندا مۇمكىن بولىپ وتىرعاندىعىن ايتىپ, «باقى­تىمىزدى باعالاي بىلەيىك!» دەپ ءتۇيدى ءوز ويىن. اسەم انمەن ارلەنىپ, كۇمبىر­لەگەن كۇمىس كۇيمەن كومكەرىلگەن بۇل كەش توي تويلاۋ عانا ەمەس, كور­نەكتى تۇل­عالار وي تولعاعان ءتار­بيە­لىك ءمانى زور, تاعىلىمى مول تاماشا كەش بولدى. نازار قاسىم.