«قازاقستان رەسپۋبليكاسى اۋعانستان جانە جەرگىلىكتى سوعىس ارداگەرلەرى وداعى» قوعامدىق بىرلەستىگىنىڭ مالىمدەمەسى

ءبىز, قازاقستان رەسپۋبليكاسى اۋعانستان جانە جەرگىلىكتى سوعىس ارداگەرلەرىن بىرىكتىرەتىن ۇيىم مۇشەلەرى دەپۋتاتتاردىڭ ءماجىلىستى تاراتىپ, پارلامەنت پەن بارلىق دەڭگەيدەگى ءماسليحاتتاردىڭ سايلاۋلارىن كەزەكتەن تىس وتكىزۋ تۋرالى باس­تاماسىن قولدايمىز. قازاقستان جاھاندىق داعدارىستىڭ كۇشەيگەن شاعىندا اۋقىمدى ينستيتۋتتىق رەفورمالاردىڭ ۇلت جوسپارى مەن داعدارىسقا قارسى ستراتەگيانى جۇزەگە اسىرۋدا. تۇتاس قازاقستاندىق قوعامنىڭ ءتيىمدى, ءارى ۇيلەسىمدى جۇمىس ىستەۋى كوزدەلگەن ءىس-شارالاردى تابىستى ىسكە اسىرۋدى قامتاماسىز ەتۋى ءتيىس. پارلامەنت – قوعامنىڭ ەڭ بەدەلدى جانە ىقپالدى مۇشەلەرىن بىرىكتىرەتىن باستى الاڭداردىڭ ءبىرى. بۇل رەتتە سايلاۋدى كەزەكتەن تىس وتكىزۋ ەلدىڭ حالىق قالاۋلىلارىنا جاڭا سەنىم مانداتىن بەرۋىنە, سول ارقىلى حالىقتىڭ بارلىق الەۋمەتتىك توپ وكىلدەرىنە قولداۋىنا يە بولۋىنا, سونىمەن قاتار, جەرگىلىكتى ءوزىن ءوزى باسقارۋ جۇيەسىن دامىتۋعا مۇمكىندىك بەرەدى. ءبىز, جەرگىلىكتى قاقتىعىستار ارداگەرلەرى قوعامداعى تۇراقتىلىق پەن تاتۋلىقتى نىعايتۋ, جاڭا قازاقستاندىق ءپاتريوتيزمدى قالىپتاستىرۋ جانە جاستاردى وتان الدىندا پارىزىن مۇلتىكسىز اتقارۋ رۋحىندا تاربيەلەۋ باعىتىندا بەلسەندى جۇمىستار اتقارامىز. بۇل تۇرعىدان العاندا پارلامەنت جانە بارلىق دەڭگەيدەگى ءماسليحاتتار سايلاۋلارى «ماڭگىلىك ەل» بولۋ جولىنداعى اسا جاۋاپتى كەزەڭگە اياق باسقان ساتتە قوعامنىڭ بىرلىگى مەن تۇتاستىعىن, جالپى العاندا, ەكونوميكا مەن مەملەكەتتىڭ نىعايا ءتۇسۋىن قامتاماسىز ەتەتىنىنە سەنىمدىمىز. سول سەبەپتى, ءبىز قوعام ومىرىنە بەيجاي قارامايتىن بارلىق قوعامدىق ۇيىمدار مەن بىرلەستىكتەردى دەپۋتاتتاردىڭ باستاماسىن قولداۋعا جانە شەشىم قابىلدانعان جاعدايدا ادال دا اشىق سايلاۋ وتكىزۋگە دايىن بولۋعا شاقىرامىز.