ومبىدا كولىككە شانا بايلاپ سىرعاناعان ەر ادام قازا تاپتى

استانا. 18 قاڭتار. رەسەيدىڭ ومبى قالاسىندا اۆتوموبيلگە شانا بايلاپ سىرعاناعان جاس جىگىت قايعىلى جاعدايعا دۋشار بولىپ, قازا تاپتى. ال كولىكتى باسقارىپ وتىرعان ونىڭ دوسى بۇل كەزدە ىشىمدىك ءىشىپ العان. بۇل تۋرالى ntv.ru-عا سىلتەمە جاساعان egemen.kz ءتىلشىسى حابارلادى. رەسەي فەدەراتسياسى ىشكى ىستەر مينيسترلىگى ايماقتىق باسقارماسىنىڭ حابارلاۋىنشا, وقيعا كەشە چەرنولۋچە اۋىلىنىڭ ماڭىندا بولعان. كولىكتى قازا تاپقان جاننىڭ دوسى باسقارعان. بۇرىلىس كەزىندە شانا جولدىڭ قارسى بەتىنە شىعىپ كەتەدى. ال ول كەزدە قارسى باعىتتا Jeep Grand Cherokee كولىگى كەلە جاتقان. سالعىرتتىق سالدارىنان شاناداعى ەر ادام سول كولىكتىڭ استىنا ءتۇسىپ, كوز جۇمدى. سونىمەن قاتار, اتالعان ۆەدومستۆونىڭ حابارلاماسىندا: «1965 جىلى تۋعان جۇرگىزۋشى «سكازكا» دەمالىس ورنىنا اپارار جولدا 1990 جىلعى ەر ادامدى كولىگىمەن باسىپ كەتتى. جول-كولىك اپاتى سالدارىنان جاس جىگىت وقيعا ورنىندا قازا تاپتى. سونداي-اق, Mitsubishi كولىگىنىڭ جۇرگىزۋشىسى – 1988 جىلى تۋعان ەر ادامنىڭ ماس كۇيدە رولگە وتىرعانى انىقتالدى. قازىرگى تاڭدا وعان قاتىستى اكىمشىلىك ءىس قوزعالدى», – دەلىنگەن. ەلامان قوڭىر. دەرەك: ntv.ru. سۋرەت: 07kbr.ru.