اسىق پىشىندەس اۆتوكولىك

«ەل ءىشى – ونەر كەنىشى» دەگەن راس ءسوز. جۇرتشىلىقتىڭ اراسىندا ءتۇرلى ونەردى مەڭگەرىپ قانا قويماي, ءوز ويىمەن جاڭا دۇنيەلەر قۇراستىرىپ شىعاراتىن ازاماتتار بار. كەڭەس وكىمەتى قيراپ, تاۋەلسىزدىكتىڭ ەلەڭ-الاڭىندا تالاي دۇنيەنىڭ قادىرى قاشىپ كەتتى عوي. سوندا كەڭشاردان قالعان كولىكتەردىڭ دە تەك قاڭقاسى قالعان كەزەڭ بولدى. اۋىلداعى جۇمانازار دەگەن اعامىز گاز-53 كولىگىنە تراكتوردىڭ موتورىن قويىپ جۇرگىزگەندە اعايىننىڭ ءبارى ايران-اسىر تاڭ قالعان. مۇنىڭ ءوزى ونەرتاپقىشتىق. ال, قىزىلوردالىق اقديدار ابدىحالىقوۆ وتاندىق كولىك ءوندىرىسىن قازاقى ناقىشپەن كومكەرىپ, دامىتۋعا نيەت قىلىپ وتىر. ول قازاقستاندىق برەندتەردىڭ ءبىرى رەتىندە ۇلتتىق قۇندىلىقتارىمىزبەن استاستىرا وتىرىپ تەمىر تۇلپار جاساعىسى كەلەدى. ويى ۇشقىر جىگىت قازىردە اسىق پىشىندەس كولىكتىڭ ۇلگىسىن دايىنداپ قويدى. ونى «اسىقپا!» دەپ اتاعان. اقديدار بۇل ءۇشىن ءبىر جىلداي ەڭبەكتەنىپتى. ءتىپتى, ءوزىنىڭ جەڭىل اۆتوكولىگىن ساتىپ, قاراجاتىن وسى تىڭ دۇنيەنى جاساۋعا جۇمساعان. اۆتوردىڭ ايتۋىنشا, كولىكتىڭ قاڭقاسىن اعاشتان ءيىپ, بىلعارىمەن قاپتاپ شىققان. ويۋ-ورنەكپەن كومكەرىپ, قىران بۇركىتتىڭ دە بەينەسىن ۇتىمدى ۇيلەستىرە بىلگەن. جىلدامدىق تەتىگىن قامشىعا, ورىندىقتارىن اسىققا ۇقساتقان. ەندى ول ءوز قولىنان شىققان جاڭا كولىك ديزاينىن پاتەنتتەپ, ەلباسىنا سىيعا تارتۋدى ارمانداپ ءجۇر. «ورىندىقتارى دا اسىق ۇلگىسىندە جاسالعان. قامشى – ول دا ءبىزدىڭ قازاقتىڭ كيەلى بۇيىمىنىڭ ءبىرى. سول قامشىنى جىلدامدىق تەتىگىنە ورناتتىم. قازاقى ۇعىمدا قامشىنى ماقتانىش تۇتىپ, قايسارلىقتىڭ, قايرات پەن قۋاتتىڭ سيمۆولى رەتىندە قارايدى عوي. سول سەبەپتى ونى دا قولداندىم. ال, ءرولىن ەلەكتروندىق تۇيمەشەمەن كەلتىردىم»,– دەيدى اقديدار ابدىحالىقوۆ. اسىق پىشىندەس «اسىقپا» اۆتو­كولىگىن وندىرىسكە جىبەرسە بولاتىنداي. ويۋ-ورنەكپەن كومكەرىلگەن, قىران بۇركىتى قالىقتاعان كولىك ءمىنىپ جۇرسەك, جاراسىمدى ەمەس پە؟! ەرجان بايتىلەس, «ەگەمەن قازاقستان». قىزىلوردا.