جاڭاوزەندە پوليتسيا ينسپەكتورىنا ۇكىم شىقتى

اقتاۋ. 12 قاڭتار. ماڭعىستاۋ وبلىسىنىڭ جاڭاوزەن قالاسىندا پوليتسيا ينسپەكتورىنا ۇكىم شىقتى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ماڭعىستاۋ وبلىسى جاڭاوزەن قالالىق سوتىندا قالالىق ىشكى ىستەر باسقارماسى اكىمشىلىك پوليتسيا ءبولىمى قارۋعا ليتسەنزيالىق رۇقسات ەتۋ توبىنىڭ ينسپەكتورىنا قاتىستى قىلمىستىق ءىس قارالدى. بەلگىلى بولعان دەرەكتەرگە قاراعاندا, 2013 جىلى 6 جەلتوقساندا اتالمىش لاۋازىمعا تاعايىندالعان پوليتسيا ينسپەكتورى وسى توپتا قىزمەت اتقارعان كەزدە اڭشىلىق جانە باسقا قارۋلاردى زاڭسىز ساقتاپ تىركەۋدەن شىعارماي ساتقان. ماڭعىستاۋ وبلىستىق ىشكى ىستەر دەپارتامەنتى وزىندىك قاۋىپسىزدىك باسقارماسى قىزمەتكەرلەرىنىڭ ارنايى ءىس-شارالارىن جۇرگىزۋ بارىسىندا اتالعان دەرەك انىقتالىپ, ايعاق زات بولىپ تابىلاتىن قارۋلار الىنعان. سونداي-اق, سوتتا سوتتالۋشى كىناسىن تولىق مويىنداعان. جاڭاوزەن قالالىق سوتىنىڭ ۇكىمىمەن ول قازاقستان رەسپۋبليكاسى قىلمىستىق كودەكسىنىڭ 361-بابىنىڭ 2-بولىگىمەن (لاۋازىمدىق وكىلەتتىكتەردى تەرىس پايدالانۋ) كىنالى دەپ تانىلىپ, مۇلكى تاركىلەنىپ, 1 جىل باس بوستاندىعىنان شەكتەۋ, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 3 جىلعا ايىرۋ جازاسى تاعايىندالدى. دەرەككوزدىڭ حابارالۋىنشا, ۇكىم زاڭدى كۇشىنە ەنبەگەن. گۇلايىم شىنتەمىرقىزى. دەرەك: ماڭعىستاۋ وبلىستىق سوتىنىڭ ءباسپاسوز قىزمەتى. سۋرەت: oren1.ru.