اقتوبەدە فيتنەس-كلۋب ورتەندى

اقتوبە. 12 قاڭتار. اقتوبە قالاسىنداعى ءىرى فيتنەس-كلۋبتاردىڭ بىرىندە ءورت شىقتى. بۇل تۋرالى egemen.kz ءتىلشىسى حابارلادى. وبلىستىق توتەنشە جاعدايلار دەپارتامەنتىنىڭ مەملەكەتتىك ءتىل جانە اقپارات توبى تاراتقان مالىمدەمەدە: «2016 جىلدىڭ 10 قاڭتارىندا ساعات 11:52-دە ءورت ءسوندىرۋ قىزمەتى بايلانىس ءبولىمىنىڭ ورتالىق پۋنكتىنە اقتوبە قالاسىنىڭ ورتالىعىندا ورنالاسقان «WorldClass» فيتنەس-كلۋبىنداعى ساۋنانىڭ ورتەنىپ جاتقانى تۋرالى حابارلاما كەلىپ ءتۇستى», – دەلىنگەن. وقيعا ورنىنا العاشقى ءورت ءسوندىرۋ بولىمشەلەرى 4 مينۋتتىڭ ىشىندە كەلىپ جەتكەن. ءورت سوندىرۋشىلەر تاراپىنان جۇرگىزىلگەن بارلاۋ بارىسىندا ءورتتىڭ فيتنەس-كلۋب ساۋناسىنىڭ بۋ بولمەسىنەن شىققانى انىقتالدى. قىزىل جالىن ساعات 12:13-تە تولىق ءسوندىرىلدى. ءورتىڭ جالپى كولەمى 4 شارشى مەتر اۋداندى الدى. عيمارات ءىشىن قويۋ قارا ءتۇتىن باسقاندىقتان, بارلىعى 38 ادام (30 قىزمەتكەر, 8 كەلۋشى) سىرتقا شىعارىلعان. ءورتتىڭ سالدارىنان زارداپ شەككەندەر بولعان جوق. ايتا كەتەيىك, ءورتتى ءسوندىرۋ جۇمىستارىنا بارلىعى 14 نەگىزگى جانە 3 ارنايى تەحنيكا, جەكە قۇرامنان 40 ادام جۇمىلدىرىلدى. ساتىبالدى ءساۋىرباي. دەرەك, سۋرەت: egemen.kz.